Lukaku arma për titull dhe Dibala për Champions-in, por Inzagi të nisë të studiojë bashkëjetesën...

jë rikthim aq i bujshëm dhe një fushatë merkatoje aq bombastike, sa askush nuk e kishte pritur tek ai Inter, i cili në vitet e fundit përflitet vetëm se faturon borxhe dhe është gjithmonë në prag të shitjes nga “Suning”. Gjithsesi, për ish-mbrojtësin zikaltër dhe analistin taktik, Daniele Adani, afrimet e Romelu Lukaku dhe Paulo Dibalës janë thjesht madhështore, por tani punën më të vështirë do ta ketë trajneri Inzagi, që të bëjë të mundur bashkëjetesën e tyre së bashku me Lautaron. “Rikthimi i Lukakut do të jetë një stimul shumë i madh edhe për trajnerin Inzagi, i cili ka për detyrë kryesore që të rrisë dhe të propozojë një tjetër sistem loje, më europian dhe agresiv. Prandaj përgjigjja ime është po, rikthimi i Lukakut më bind, pas një sezoni faliment te Çelsi. Ndonëse mund të kishte disa dyshime, të gjithë e pamë se çfarë ishte në gjendje që bënte Romelu në dy vite me Konten, prandaj e them me bindje se Inzagi do të ketë një superskuadër në dispozicion. Çfarë ndryshon nga Konte tek Inzagi? Do të jetë interesante të shohim nëse do të dijë të kalojë nga një futboll që e shihte protagonist absolut me Konten, te një sistem më përmbledhës, më sakrifikues, me më shumë zotërim topi. Me Konten Romelu kishte rolin e magnetit të ekipit, pasi të gjithë topat drejtoheshin tek ai, ndërsa Inzagi do më shumë qarkullim, më tepër zotërim dhe shpërndarje loje, pak a shumë si Tuheli te Çelsi ku Lukaku zhgënjeu. Si e shoh tredhëmbëshin Lautaro-dibala-lukaku? Pikësëpari Lautaro dhe Lukaku e njohin njëri-tjetrin me sy mbyllur, por të mos harrojmë se bashkëjetesa me Romelunë e bëri “Demin” që të zhvillonte sezonin më të mirë të karrierës. Por tani në mes hyn edhe Dibala... Sigurisht që për nga cilësitë po flasim për tre titullarë të padiskutueshëm. Problemi është se që të tre janë lojtarë që duan topin ta kenë të tyrin dhe askush nuk mund të pranojë të bëjë sulmuesin apo mesfushorin e krahut. Këtu nis pikëpyetja më e madhe e kësaj merkatoje ëndrrash... A do te jetë i zoti Inzagi që të bëjë të mundur bashkëjetesën e të treve? Nuk e di, ndonëse unë dua të kem besim. Por sido që të jetë, Simone bën mirë që të nisë të studiojë deri natën vonë për sistemin e lojës që mund të përfshijë këtë treshe”, përfundoi Adani.