Akuzohet për falsifikimin e bilancit, ja çfarë rrezikon De Laurentis

Aurelio de Laurentis ka përfunduar nën hetim për falsifikim bilancesh mbi transferimin e Viktor Osimhenit te Napoli. “Guardia di Finanza” (Krimi Ekonomik) me urdhër të Prokurorisë së Napolit ka kryer një sërë kontrollesh në zyrat e klubit për të sekuestruar dokumente të lidhura me kontratën e nigerianit që është vënë në qendër të vëmendjes qysh në hetimin fillestar të hapur për rastin e plusvalencave fiktive, një pikë për të cilën janë hetuar të gjitha klubet e mëdha italiane. Siç ka sqaruar organi i prokurorisë, përveç dokumentacionit, janë konfiskuar edhe postat elektronike të presidentit dhe familjes së tij, të cilat do të shërbejnë si provë për të hetuar shkeljet që pretendon organi i akuzës. Por për çfarë akuzohet konkretisht De Laurentis?

TRANSFERIMI - Në merkaton e verës së 2020-ës, Napoli bleu nga Lila (edhe klubi francez po hetohet) Viktor Osimhenin duke përfshirë në marrëveshje portierin Karnezis dhe të rinjtë Kaludio Manzi, Çiro Palmieri e Luixhi Liguri. Me përjashtim të portierit ama, asnjëri prej tyre nuk mbërriti asnjëherë te Lila duke u transferuar menjëherë në klube të tjera. Ajo që dyshohet është se vlera e lojtarëve të sipërpërmendur është shumëfishuar në bilance nga ajo reale. 5.1 milionë euro është vlera e Karnezit në bilanc, kundrejt 500 mijë eurove që është vlera reale dhe i njëjti diskutim vlen edhe për të rinjtë. Çiro Palmieri është regjistruar me një vlerë prej 7 milionësh kundrejt 100 mijë eurove, ndërkohë që Luixhi Liguri e Klaudio Manzi kanë një vlerë reale prej 100 mijë eurosh secili, por në llogari rezultojnë me një vlerë prej 4 milionë eurosh secili. Të tilla shifra kanë ngjallur dyshime, por gjithsesi ngelen ende për t’u vërtetuar. Nga pikëpamja sportive, Napoli mund të rrezikonte nga sanksionet me pikë deri në përjashtimin nga kampionati, por kjo e fundit ndodh vetëm nëse falsifikimi i bilancit do të ndodhte për të regjistruar klubin në kompeticione sportive të caktuara, një hipotezë që nuk ka lidhje me situatën aktuale, ku hetimet bien vetëm mbi presidentin. Nëse provohet shkelja e rregullave, De Laurentis mund të ndalohet të ushtrojë funksionin e tij për të paktën një muaj, shoqëruar me gjoba të majme në llogaritë e tij.