Ikën Granovskaia, ka aq pasuri sa mund të blejë Evertonin

Gruaja më e pushtetshme e futbollit largohet nga Çelsi me çek 20 milionë paundësh

Marina Granovskaia pritet të zyrtarizojë lamtumirën e saj nga Çelsi me çekun e shpërblimit prej 20 milionë paundësh nga pronari i ri Tod Bohli, për menaxhimin e shitjes së klubit nga Roman Abramoviç te biznesmeni amerikan. Drejtoresha e klubit do të largohet nga “Stamford Bridge” në fund të këtij muaji dhe disa javë pas zyrtarizimit të shitjes së klubit për 4.25 miliardë paund te Bohli. Roman Abramoviç nuk përfitoi asnjë qindarkë pas sanksioneve të vendosura nga qeveria britanike me akuzën e mbështetjes së presidentit rus Vladimir Putin në konfliktin me Ukrainën. Krahu i djathtë i oligarkut rus ka qenë një figurë shumë e rëndësishme e klubit për gati dy dekada. Ajo u zhvendos në Londër kur Abramoviç bleu blutë e Londrës në vitin 2003 për 150 milionë paund dhe fillimisht nuk kishte kontakt me Çelsin. Në vitin 2010 ajo u bë një përfaqësuese e klubit dhe bordit iu bashkua vetëm tri vite më vonë. Vitin pasardhës u promovua si administratore e klubit dhe prej atëherë është konsideruar si gruaja më e pushtetshme e futbollit në botë. Çelsi konfirmoi të hënën se presidenti i klubit, Brus Bak, do të japë dorëheqjen nga klubi në fund të këtij muaji pasi shërbeu për 19 vite në këtë detyrë. 76-vjeçari Bak u falënderua nga Bohli për kontributin e tij gjatë këtyre dy dekadave. Pronari i ri i ka dhuruar atij një bonus prej 10 milionë paundësh për menaxhimin e tranzicionit të klubit nga Abramoviç tek ai. Por 40% të bonusit nga 50 milionë paund në total do të ndahet për Granovskaiën dhe pjesa tjetër për stafin e menaxhimit të Çelsit. Sipas “The Sun”, 47-vjeçarja Granovskaia largohet me një pasuri që fare mirë mund të blinte sot klubin e Evertonit.