Jazaj: Shabanit i ofruam të drejtonte akademinë, duam trajner me autoritet
Pasi shkarkuan Besmir Shabanin, tek Oriku janë hedhur në sulm për të gjetur trajnerin e ri. Nuk janë vetëm Eqerem Memushi dhe Arlind Rustemi kandidatë për stolin. “Panorama Sport” zbulon edhe tre emra të tjerë të njohur të trajningut shqiptar që kanë dalë në skenë për pankinën e ekipit të sapongjitur në Kategorinë e Parë. Drejtuesit kanë kontaktuar Gerd Haxhiun, Gentjan Mezanin dhe Artan Sakajn. Por Mezani dhe Sakaj kanë kthyer përgjigje negative. I pari do të vijojë karrierën në Kosovë, ndërsa i dyti për arsye familjare. REAGIMI – Pas vendimit të beftë të marrë për stolin, reagon Muharrem Jazaj. Në një deklaratë të
dhënë për gazetën, ai shpjegon arsyet për largimin e Shabanit. “Nuk ka zhvillime konkrete për trajnerin e ri. Në fakt, vlerësoj punën e Besmir Shabanit dhe bashkëpunimin që kemi pasur me të. Ia doli në kushte të vështira. Nuk është e vërtetë që e larguam, por i ofruam detyrën e
drejtorit të akademisë dhe postin e trajnerit U-19. Ne jemi kampionë me moshat. Ndryshimin e bëmë pasi duam që të gjejmë një trajner me eksperiencë dhe me më shumë autoritet. Jemi duke parë disa emra dhe do ta zgjidhim shumë shpejt. Kampionati që vjen është i fortë dhe
ne duam të kemi një ekip të motivuar. Duhet të jemi dy marshe më lart se nga Kategoria e Dytë dhe kjo është përgjegjësi”, thotë Jazaj. GRUPI - Administratori i klubit konfirmon qëndrimin e grupit aktual, si dhe tratativat për të afruar lojtarë nga Labëria dhe Flamurtari. “Grupi
aktual është i konfirmuar. Jemi duke kërkuar edhe përforcime. Por jemi për lojtarë vlonjatë sepse kanë kosto të ulët dhe e ndiejnë peshën e fanellës. Duke qenë se Labëria nuk u ngjit në Kategorinë e Parë, presim të na vijnë lojtarë të saj. Por do të marrim edhe nga Flamurtari, pas një
marrëveshjeje të arritur me presidentin Sinan Idrizi. Shumë shpejt do të nisë edhe ndërtimi i fushës së re të stadiumit, me qëllim që skuadra të ketë kushte sa më optimale për përgatitjen dhe zhvillimin e ndeshjeve”, përfundon Jazaj.