Lukaku, ultrasit i dalin kundër

Tifogrupi “Curva Nord” nuk e harron tradhtinë dhe bën thirrje: Mos shkoni ta prisni “Është konsideruar dhe trajtuar si mbret , por tani edhe ai është një si gjithë të tjerët”

Tashmë për rikthimin e Romelu Lukakut tek Interi mungon vetëm zyrtarizimi, një rikthim që ka gëzuar jo pak trajnerin Simone Inzagi dhe pjesën dërrmuese të tifozërisë zikaltër. Jo pak herë është cilësuar ai njeriu i titullit të sezonit të kaluar, por pavarësisht kësaj, pakkush e ka harruar largimin e tij një vit më parë në drejtim të Çelsit, një largim që u shoqërua me fjalët “Ishte ëndrra ime të rikthehesha në Londër”. Tradhtia nuk është kapërdirë edhe sot e kësaj dite te tifozët zikaltër dhe mbi të gjitha te grupimi i ultrasve “Curva Nord”, marrëdhënia me të cilët është e akullt.

REAGIMI - Në këtë muaj të nxehtë qershori Lukaku zgjodhi t’u largohej vranësirave të Londrës, të paktën për një vit me shpresën se dielli i Milanos do të shkrijë edhe raportin e tij me tifozët zikaltër, të cilët nuk reaguan gjatë tratativës, por nuk lanë pa koment përfundimin e saj. “Duke qenë se rikthimi i Lukakut tek Interi është tani më shumë se një mundësi, duhet t’i bëjmë të qarta disa gjëra”, niste mesazhi i “Curva Nord” në rrjetet sociale duke vazhduar: “Ne mbështesim Interin dhe nuk do ta kontestojmë lojtarin pavarësisht sjelljes së verës së kaluar. Gjithsesi, asnjë prej grupimeve tona nuk do të lejohet të shkojë për ta pritur me shaje ose simbole zikaltër dhe çdo grimcë mbështetjeje që do t’i japim këtej e tutje, duhet të fitohet me shumë përulësi dhe djersë në fushë. Është konsideruar mbret dhe është trajtuar si i tillë, por tani edhe ai është një si gjithë të tjerët”. Edhe pse kanë sqaruar se nuk do ta kontestojnë 29vjeçarin, tifogrupi nuk ka lënë pa përmendur tradhtinë. “Nuk do të kontestojmë një lojtar të Interit, por e kuptojmë kur dikush na tradhton dhe kjo na ka bërë të ndihemi keq. Ftojmë të gjithë tifozët e Interit të mos bien në kurth dhe të vrapojnë pas tij. Tani Romelu ke një rrugë të gjatë përpara”, ka qenë përfundimi i postimit të “Curva Nord”, që i kanë konfirmuar Lukakut se klima që do të gjejë nuk do të jetë ajo e rikthimit në familje, përkundrazi. Tani duhet të rifitojë statusin e mëparshëm dhe sfida i është lëshuar.

Në dhjetor Romelu Lukaku zbulonte dëshirën e tij për t’u rikthyer tek Interi, një dëshirë që nuk u prit mirë te tifozët zikaltër, të cilët i dedikuan një banderolë jashtë kangjellave të “Pinetina”-s, për të treguar qëndrimin e tyre. “Nuk ka rëndësi kush largohet me shiun, ka rëndësi kush qëndron në stuhi, Romelu”, ishte mesazhi që shënjestronte largimin e konsideruar tradhti të belgut.