Herald Marku në Shkodër, Vllaznia “shënjestron” Shefitin
Herald Marku do të rikthehet te Vllaznia. Mesfushori me origjinë nga Shkodra ka arritur të gjejë dakordësinë për ndërprerjen e kontratës me Partizanin dhe ka lënë fazën përgatitore, që të kuqtë po zhvillojnë në Slloveni. Ditën e djeshme ai ka zbarkuar në Tiranë, ku po kryen procedurat e ndarjes me Partizanin, teksa menjëherë pas kësaj mesfushori pritet të zyrtarizohet në Shkodër, ku luajti para dy sezonesh dhe shkëlqeu. Herald Marku kishte edhe një sezon me kontratë me Partizanin, por emrat e shumtë në mesfushën e të kuqve dhe fakti që në sezonin e shkuar nuk luajti rregullisht, e shtynë më së shumti të bashkohej edhe një herë me Vllazninë, ku fitoi Kupën dhe u shpall nënkampion në sezonin 2020-2021. Marku luajti si titullar në të dyja miqësoret e Partizanit në Slloveni ndaj Murës dhe Jadran
Dekanit, teksa parashikohej i tillë edhe ndaj Saburtalos. Megjithatë, pas deklaratës publike të presidentit Xhaferi për kontaktet me mesfushorin, gjërat kanë evoluar shpejt. Pavarësisht se trajneri Mehmeti dhe drejtuesit i kishin bërë të qartë 26-vjeçarit se ishte në planet e tyre, ai ka këmbëngulur të kthehej në Shkodër, ku ka kujtime të bukura. Mund të themi se zyrtarizimi i Markut te Vllaznia tashmë është thjesht një “adet” për t’u kryer. Ai pritet të udhëtojë me ekipin në Austri për fazën përgatitore
ditën e nesërme.
SHEFITI – Drejtuesit e Vllaznisë po punojnë në të gjitha drejtimet për të afruar lojtarë cilësorë për sezonin e ri. Sulmi është vetëm një nga repartet ku ka nevojë për ndërhyrje. Burime për “Panorama Sport” bëjnë me dije se Shefit Shefiti është shënjestra e radhës në merkaton e kuqebluve. Sulmuesi i dalë nga akademia e Shkëndijës së Tetovës në dy sezonet e fundit ishte pjesë e Rabotnickit po në kampionatin e Maqedonisë së Veriut. Shefiti shënoi 6 gola dhe dhuroi po aq asiste në sezonin e fundit me Rabotnickin
në kampionat, ku zhvilloi 28 ndeshje, 19 si titullar. Vllaznia i ka bërë një ofertë konkrete 24-vjeçare ish-lojtarit të Kombëtares sonë Shpresa dhe në rast se gjithçka shkon në rrugën e duhur, Shefiti do të vihet nën urdhrat e trajnerit Josa në fazën përgatitore. Siç mësohet nga gazeta, në tavolinën e Shefitit është edhe një opsion tjetër transferimi, me drejtuesit shkodranë, që i kanë vënë ditën e sotme si afatin e fundit. Tetovari mund të luajë në të tria pozicionet e sulmit, me anën e majtë më të preferuarën. Afrimi i tij vë jo pak në dyshim qëndrimin e Latifit në Shkodër.