Kukësi, Arbër Basha afrimi i pestë
Mesfushori i larguar nga Kastrioti ka firmosur për tri vite me skuadrën e vendlindjes “Privilegj të luaj për ekipin e qytetit tim, dua ta ndihmoj me gola dhe asiste për objektivin”
Kukësi i ka çuar në pesë afrimet e kësaj merkatoje vere dhe në dy lojtarët me mbiemrin Basha, ku i pari është kroati Edi Basha. I fundit që ka hedhur firmën nën kontratë është mesfushori Arbër Basha, i cili do të qëndrojë për tri sezone me ekipin e tij të vendlindjes. 24-vjeçari vjen në Kukës pas tri sezoneve të zhvilluara me Kastriotin e Krujës, dy prej të cilave në elitë dhe një në Kategorinë e Parë. Ka qenë vetë klubi verilindor që ka zyrtarizuar afrimin e tij nëpërmjet një komunikate në faqen në “Facebook”. Sezonin e kaluar Basha u aktivizua në 30 takime me krutanët, ku edhe arriti të shënonte dy gola, një pikërisht ndaj Kukësit. Klubi është duke
vijuar me politikën e kontratave afatgjata dhe njëkohësisht rikthimin në skuadër të lojtarëve që janë me origjinë nga Kukësi, një kërkesë kjo e vetë kryebashkiakut Safet Gjici, e cila është përkrahur gjithashtu edhe nga trajneri Skënder Gega.
PRONONCIMI - Vetë mesfushori nuk i ka fshehur emocionet për veshjen e fanellës së Kukësit, duke shpresuar që të bëjë gjëra të mëdha në stadiumin e ri përpara tifozëve. “Është kënaqësi dhe privilegj për mua të luaj me ekipin e qytetit tim. Përveç këtij fakti, do të luaj me një skuadër që çdo vit ka pretendime të larta dhe natyrisht ky është një motivim akoma më i madh për mua. Tifozët e Kukësit janë të mrekullueshëm dhe shpresoj të bëjmë gjëra të mëdha në stadiumin e ri. Shpresoj që të kontribuoj
sa më shumë në ekip me gola dhe asiste për të arritur objektivat që kemi. Forca Kukësi”, u shpreh Basha për kanalin zyrtar të klubit.
MERKATO – Edhe pse Kukësi deri më tani ka afruar pesë lojtarë, pritet që merkatoja të mos mbyllet me kaq.
Burime të besueshme të “Panorama Sport” konfirmojnë se klubi ka arritur marrëveshjen edhe me një tjetër mesfushor, i cili pritet të prezantohet së shpejti, për ta dërguar në gjashtë numrin e të afruarve në skuadër. Këto afrime pritet që të kompensojnë largimet e shumta që kanë ndodhur në kampin verilindor gjatë kësaj merkatoje vere, ku shumë prej futbollistëve dolën të tepërt dhe nuk ishin më në planet e klubit, duke parë edhe sezonin e dobët që zhvilluan së fundmi. Ajo që bie në sy në afrimet e bëra, lidhet me mungesën e emrave “big”, pasi Gega preferon që të ndërtojë një skuadër me lojtarë që konsiderohen punëtorë. Gjithsesi, deri në mbyllje të merkatos nuk përjashtohet edhe afrimi i ndonjë futbollisti të njohur, që mund t’i bëjë vërtet punë skuadrës.