Juve, Di Maria konfirmon: Jemi në detajet e fundit
Pas Pogbasë, bardhezinjtë akord edhe me argjentinasin Alegri fërkon duart, por Angeli do të firmosë për 1 vit
Angel di Maria më në fund do të vish et bardhezi. Lajmi që shumë prisnin në Torino, trajneri Masimiliano Alegri më shumë se kushdo tjetër më në fund merr konfirmime të rëndësishme dhe tani po që edhe Juventusi i ri nis të marrë formë dhe të rikthehet që të frikësojë këdo në Itali. Pas akordit me Pol Pogbanë, pa dyshim që të shtuarit edhe argjentinasin në skuadër është një hap i rëndësishëm për të pasur një repart ofensiv që duket më shumë sesa i rrezikshëm, duke parë se çfarë kanë bërë në karrierën e tyre dy juventinët “e rinj”. Pol Pogba garanton cilësi në mesfushë dhe goditje me breshëri nga jashtë zone. Madje, edhe gola nga distanca, duke qenë se në aventurën e parë me Juventusin, shifrat flasin për 21 gola nga 34 në total nga jashtë zonës rivale. Ndërkohë, Di Maria është një futbollist që menaxhon në mënyrë perfekte korsinë e majtë, por edhe të djathtë. Është i shpejtë dhe i saktë në driblim, por specialiteti i tij janë asistet dhe këto nevojiten për të ndezur motorët e gjigantit serb, Dushan Vlahoviç. Prandaj, tani të gjithë te Juventusi presin fillimisht firmat dhe zyrtarizimet e dy lojtarëve që do të shtojë ndjeshëm edhe dozën e eksperiencës europiane në pritje të Champions-it të ardhshëm, por në të njëjtën kohë edhe t’i shohin në aksion dhe të shpresojnë që me Pogbanë e Di Marian “Zonjë e Vjetër” do të rikthehet të luftojë denjësisht për çdo trofe në Itali të paktën, pas dy vendeve të katërta, por pse jo edhe në Ligën e Kampioneve.
KONFIRMIMI
Ndonëse për momentin nuk ka një datë fikse mbi zbarkimin e “El Fideos”, fjalët e stafit menaxherial të tij për të përditshmen torineze “La Stampa” janë ato që të gjithë donin të dëgjonin: “Po flasim për detajet e fundit me Juventusin dhe besoj se nëse ato plotësohen do të vijë normalisht edhe firma e Angelit në kontratë. Jemi pranë mbylljes dhe besojmë se do të shkojë gjithçka siç duhet”. Detajet për të cilat stafi i Di Marias flet është çështja e kohëzgjatjes së kontratës. Sulmuesi i majtë duket se ka dëshirë që të kthehet shpejt në Argjentinë
dhe për momentin këmbëngul për të pasur vetëm 1 vit kontratë me Juven (drejtuesit do ta donin për 2 vite), për të mos qenë i kushtëzuar mbi një zgjedhje tjetër të mundshme pas Botërorit dhe verës së ardhshme. Ndërkohë, Angel ka pranuar 7 milionë
euro në sezon, ndërkohë që me një akord 2-vjeçar rroga pritej të ishte edhe më e lartë për 34-vjeçarin, pasi taksat që Juventusi do të duhej të paguante do të ishin më të ulëta, falë “Dekretit të rritjes”, ligji italian i aprovuar në vitin 2018.