Rinovimet, stadiumi e merkatoja, ja frontet e hapura
Milani do të rikthehet në grumbullim më 4 korrik, këtë herë me petkun e kampionëve të Italisë dhe me përgjegjësinë për të përgatitur sa më mirë këtë fazë që do të paraprijë nisjen e sezonit të ri. Stefano Pioli dhe të tijtë duan të mbrojnë titullin e po ashtu të bëjnë një prezantim dinjitoz në Europë, por deri atëherë klubi po punon në disa fronte të cilat pritet të konsolidojnë të ardhmen e kuqezinjve.
MALDINI-MASARA-GAZIDHIS - Duke e nisur nga kryesia, për Maldinin dhe Masarën është shumë pranë rinovimi i kontratës dhe nga momenti në moment mund të vijë zyrtarizimi. Me pronësinë e re u përcaktua edhe buxheti për merkaton verore prej 50 milionë eurosh. Me gjetjen e gjuhës së përbashkët për lirinë që do të kishin dy drejtuesit në merkato dhe pavarësinë e tyre në fushat përkatëse, priten shumë shpejt firmat mbi kontratat e reja që do t’i lejojnë Maldinit e Masarës t’i japin vazhdimësi projektit fitues të Milanit. Për Ivan Gazidisin, ndërkohë, do të pritet nëntori, nuk ka asnjë urgjencë për rinovimin e tij.
STADIUMI – Akoma ngelet për të përcaktuar zona ku Milani do të ndërtojë stadiumin e ri ashtu siç nuk dihet ende nëse do të jetë në bashkëpronësi me Interin. Për momentin ngërçi po vjen nga zgjedhjet për kryetar bashkie të zonës së Sestos, që është zona ku është projektuar të ndërtohet ambienti i ri dhe më pas do të rinisin bisedimet që të mund t’u sigurojnë kampionëve një impiant modern.
MERKATO – Sigurisht që fronti i cili merr të gjithë vëmendjen dhe që u intereson më shumë tifozëve, është përforcimi i skuadrës dhe afrimet që do të kryhen për ta realizuar këtë. Momentalisht “Djalli” ka disa pika kyçe për të cilat duhet të kujdeset, siç është gjetja e një zëvendësuesi për Kesinë, një qendërmbrojtës në vend të Romanjolit, një fantazist dhe një mesfushor i djathtë sulmues. Të shumtë emrat që synohen me Zijeh për të cilin ka probleme me formulën e transferimit, Traore që kushton shumë apo Renato Sançesin për të cilin konkurrent është PSG-JA, pa lënë pas dore yjet e Serisë A, Dibalën e Zaniolon të cilët po i ndjek me kërshëri. Kushedi nëse të hënën e ardhshme, në Milanelo, Pioli do të mund të presë edhe dikë tjetër veç atyre që e çuan te triumfi në kampionat më 22 maj.