Lautaro kishte firmosur me Atletikon, por tani kërcënimi është Antonio Konte
Lautaro Martinez është konsideruar si i paprekshëm në radhët e Interit, pavarësisht mbërritjeve të reja në atë repart. Argjentinasi, që ka e ka pasur sezonin më të mirë të karrierës atë që lamë pas, është kthyer në qendër të projektit të zikaltërve duke përmbushur pritshmëritë e klubit, që kanë ekzistuar që në momentin që ai vuri këmbën në Milano. Por nuk e ka pasur vetëm Interi një vizion të tillë për sulmuesin, por edhe Atletiko Madrid, e cila në 2017 ishte e sigurt se “demi” do të transferohej në Spanjë. Siguria e madrilenëve nuk vinte vetëm nga premtime mes palëve, por nga hapa konkretë të ndërmarrë, siç ka zbuluar ditën e djeshme “Mundo
Deportivo” që ka publikuar fotografi të Lautaros nga momenti i nënshkrimit të kontratës me Atletikon. 24-vjeçari kishte kryer të gjitha procedurat duke kaluar vizitat mjekësore dhe operacioni ishte 99% i përfunduar derisa në skenë doli Interi dhe Lautaro tërhoqi pas të gjitha veprimet e tij, duke zgjedhur italianët.
TOTENHEMI - E që nga ai moment Lautaro duket se zgjedh Interin gjatë çdo merkatoje verore që e përball atë me tundime nga më të ndryshmet. Atletiko është gjithmonë aty, me Simeonen që asnjëherë nuk e ka fshehur simpatinë për numrin 10 aktual të zikaltërve, por është edhe dikush tjetër që nuk qëndron vetëm duke
parë: Antonio Konte. Ish-trajneri i Interit e njeh mirë argjentinasin që e ka stërvitur për dy sezone dhe i ka kërkuar Totenhemit të jetë ai dhurata për Champions League. Sipas “Daily star”, kryesia e londinezëve po përgatit një ofertë që shkon deri në 80 milionë euro, një shifër joshëse, por që do të jetë sërish e pamjaftueshme për të bindur Interin. Zikaltrit e dinë mirë rëndësinë që ka sulmuesi për Inzagin dhe skuadrën dhe nuk do ta sakrifikonin atë, edhe pse në fund nevoja për të arkëtuar mund t’i detyrojë italianët të heqin dorë nga Lautaro, natyrisht për një shifër edhe më të lartë se ajo e propozuar nga Totenhemi.