Xhixha: Orgesi më tha shko dhe mos u kthe më
Redon Xhixha vetëm dje është zyrtarizuar si lojtari më i ri i Karabakut. Sulmuesi la bardheblutë për këtë aventurë të re në Azerbajxhan, në një transferim të papritur drejt një klubi të njohur. Ai ka zbuluar gjithçka rreth kësaj lëvizjeje në intervistën e tij me "Skype" në emisionin "Panorama Sport" në "Panorama TV", në bashkëbisedimin me moderatoren Vjosana Nozllaku.
Keni mbërritur në Azerbajxhan. Cili është opinioni i parë juaji?
Kam mbërritur në Azerbajxhan dhe po ambientohem me vendin, por deri tani jam mirë. Duket mirë dhe besoj se do të ambientohem shumë shpejt. Të them të drejtën këtë pjesën e Karabakut nuk e dija, deri dy ditë para se të bëhej ky transferim dhe janë marrë menaxherët e mi. Ditën e ndeshjes me Bylisin më thanë që ka marrë fund, është e kryer.
Si e pritën te Tirana, sidomos drejtuesit e skuadrës dhe tifozët?
Ndoshta edhe mund të jenë mërzitur pak se isha golashënuesi i skuadrës, por ndoshta edhe janë gëzuar se solla të ardhura për skuadrën. Por edhe për mua se po provoj një eksperiencë jashtë dhe mund të bëj hapa të tjerë përpara. Peng nuk kam, pasi isha te Tirana dhe fitova kampionatin e Superkupën. Isha golashënuesi i skuadrës e Superiores deri në momentin që u largova. Kam qenë jashtëzakonisht i lumtur, do të më mungojë ekipi, se kam kaluar 1 vit e gjysmë dhe i kam si familje, jo si shokë, do të më mungojë qyteti. Por do të mundohem të ambientohem sa më shpejt këtu. Tirana është Tirana, është ekipi që vetëm me emër dhe kundërshtarët e kanë pak frikë. Sa i përket kampionatit, jam i sigurt se do të bëjnë mirë dhe do ta fitojnë, ua kam dhënë fjalën që do të vij në maj që të çojmë kupën numër 30 e shpresoj të jem atje se jam i bindur që Tirana do të ngrejë trofeun.
Çfarë ju tha Orges Shehi para se të largoheshit?
Të gjithë ishin të gëzuar për mua, edhe ditën e fundit që i takova me trajnerin ishin të gëzuar e më uruan gjithë të mirat. Trajneri më tha: "Shko e të uroj të të ecë mirë, dhe mos u kthe në Shqipëri, vetëm pas disa viteve, shumë, shumë larg. Largohu, bëj më mirë atje e mos u kthe në Shqipëri, vetëm në fund të karrierës". Edhe çunat ishin të gëzuar se falë tyre e trajnerit ia dola të bëja këtë transferim, se kanë dhënë ndihmën e tyre. Pa ta nuk do të bëja kaq mirë sa bëra. Me ndihmën e tyre dola në pah edhe unë e u transferova.
Ju dhe Skuka ikët, por ikët të dy nga Shqipëria. Rivaliteti me Skukën si ka qenë këtë sezon?
Të them të drejtën me erdhi pak keq se ishte diçka e bukur se ishin dy ekipet e kryeqytetit dhe dy sulmuesit e tyre. Ishte një luftë për titull mes dy skuadrave, por edhe për "Këpucën e Artë" mes sulmuesve të Tiranës dhe Partizanit. Ika unë, iku edhe Skuka, unë ia thashë ditën e fundit, dua që "Këpucën e Artë" ta fitojë Hasani, sepse është një lojtar jashtëzakonisht i mirë dhe ka shumë cilësi. Skukës i uroj shumë fat në ekipin e tij dhe t'i shkojë sa më mbarë e të shënojë sa më shumë gola e të bëhemi bashkë në Kombëtare. Të harrojmë këtë rivalitetin që kishim e golat t'i bëjmë për Kombëtaren.
Si ishte pritja te skuadra e re?
Drejtori sportiv dhe pjesëtarët e tjerë të stafit më pritën shumë mirë, edhe tifozët më kanë dërguar jashtëzakonisht shumë mesazhe mirëseardhjeje. Trajnerin dhe lojtarët nuk i kam takuar, se nuk janë në qytet, meqë kishin ndeshje, sot do t'i takoj të gjithë. Ekipi është në Ligën e Konferencës dhe jam i lumtur, shpresoj të shënoj dhe të vazhdojmë më lart.
Po, kam folur dje me të. Kisha një bisedë jo shumë të gjatë me të. Më uroi e më dha disa këshilla e shpresoj që të ndjek historinë që ka te klubi i Karabakut, se me sa kam parë këtu, ai ka qenë legjendë.
Karabaku dhe Tirana, si i shihni?
Nga mënyra e lojës nuk ka shumë ndryshim se ka të njëjtën lojë si Tirana, ndaj shpresoj të ambientohem shumë shpejt me të.
Si e priti familja?
Normalisht ishin të gëzuar se është një ditë që e prisnim të vinte, që të transferohesha jashtë Shqipërisë. Por paralelisht edhe të mërzitur se nuk do të jem çdo ditë në Shqipëri. Por ky është futbolli, tani do të ndjek rrugën e jetën time e të vazhdoj përpara.
Jeta personale si është. Keni lënë pas dikë?
Xhixha është në Karabak e do të jetojë këtu… (qesh). Normale që edhe njohim e flasim me goca, por Xhixha tani është "single". Momentalisht nuk e kam mendjen aty se ky muaj realisht ishte edhe pak stresues e i përkushtuar te karriera. A do të bëhej apo jo transferimi dhe nuk kemi pasur kohë për ato gjera. Ndaj Xhixha është "single".