Junajtid shkatërron Notingem Forestin, me një këmbë në finalen e “Wembley”-t

Mançester Junajtid është me një këmbë në finalen e Kupës së Ligës, e cila mund t’i japë fund pritjes së tyre 6-vjeçare pa fituar një trofe, pas suksesit 3-0 në fushën e Notingem Forestit në gjysmëfinalen e vajtjes së këtij kompeticioni. Në vizitën e parë të “Djajve” në “City Ground”, që prej fitores 8-1 në shkurtin e vitit 1999, skuadra e Ten Hagut heshti stadiumin e Forestit, ashtu siç bëri 24 vite më parë dhe pas 6 minutash shënoi me të zakonshmin Rashford (9 gola në 10 ndeshjet e fundit). Sulmuesi i Junajtid mori topin në mesfushën e tij dhe gjeti shtegun mes Uorall dhe Frojler, përpara se të mposhte Henesejn në shtyllën e parë. Foresti u dorëzua pas këtij goli të shpejtë dhe Junajtid iu afrua golit me Antonin. Por skuadra e Kuperit e gjeti golin e barazimit me Sarrixh në një kundërsulm të shpejtë, por ai u anulua për pozicion jashtë loje. Vendësit u bënë kërcënues me Gibs-uajt dhe Xhonson, por sërish De Gea mbeti larg telasheve. Rastet e shpërdoruara bënë që Junajtid të përfitonte dhe në fund të pjesës së parë erdhi edhe goli i parë i Vut Veghorstit me fanellën e skuadrës së re, i cili ishte në vendin dhe momentin e duhur në zonë pas një topi të pritur nga portieri. Në pjesën e dytë Eriksen goditi traversën me një gjuajtje nga jashtë

zone, por miqtë e gjetën edhe golin e tretë me Bruno Fernandeshin, pas një goditjeje të portugezit në hyrje të zonës. Ndeshja e kthimit në “Old Trafford” duket si një formalitet, ndërsa në shtëpi “Djajtë” nuk munden prej fillimit të shtatorit. Bileta në “Wembley” është shumë pranë.