Martini: Fitoren ia dedikoj Sabah Bizit
Teuta arriti një fitore të rëndësishme në garën për mbijetesë, duke mposhtur në transfertë Partizanin me rezultatin 0-2. Pas sfidës, trajneri i durrsakëve, Edi Martini, u shpreh tepër i lumtur për vazhdimësinë që ka skuadra dhe për tri pikët kundër “demave”. Ai ka elozhe për Albion Markun, që shënoi një gol shumë të bukur.
VAZHDIMËSIA - “E rëndësishme është që ne kemi vazhdimësi në rezultate. Është gjithashtu shumë e rëndësishme që kemi stabilizuar mbrojtjen. Cilësia është rritur. Dua t’i përgëzoj djemtë. Kanë bërë një ndeshje të shkëlqyer”.
GARA - “Lufta në këtë kampionat është jashtëzakonisht e fortë. Ne po kërkojmë t’i sulmojmë ekipet. Duhet t’i falënderoj djemtë, sepse për asnjë moment nuk u shpërqendruan në lojë”.
GRUPI - “Edhe Qaqi, edhe Kallaku kanë bërë një ndeshje të shkëlqyer sot. Nuk duhet të merrem me emra të përveçëm. Një lojtar të bën të fitosh një ndeshje, ndërsa grupi të çon përpara. Tabela është e pamëshirshme. Kur e shikon veten në vend të fundit, nuk të shohin sytë”.
GOLI I MARKUT - “Nota 10. Nuk e bëri as me këmbën e tij më të mirë, por me të majtën. Ai është një djalë i përkushtuar dhe punon në stërvitje.
“SI DIKUR” - “Tani jam i mbaruar (qesh). Më dhëmbin gjunjët, nuk mund t’i bëj më goditjet standarde”, u shpreh Martini për “Oversport”.
DEDIKIMI - Trajneri i Teutës foli shumë shkurt edhe për gazetën, ku kishte një porosi të veçantë. Këtë fitore ai ia dedikon një figure shumë të shquar të futbollit tonë, pikërisht Sabah Bizit. “Fitoren ndaj Partizanit ia dedikoj legjendës së futbollit shqiptar, Sabah Bizi, me rastin e 75-vjetorit të lindjes”, ka thënë ai për “Panorama Sport”.