“Paris 2024”, Hidalgo: Po rusëve në Lojërat Olimpike
Kryebashkiakja, e hapur për lejimin e atletëve në olimpiadë “Nuk duhet të privojmë askënd, por të garojnë si neutralë”
Atletët e Rusisë dhe Bjellorusisë nuk duhet të ndalohen për të marrë pjesë në Lojërat Olimpike “Paris 2024”, por këtë duhet ta bëjnë me statusin e sportistëve neutralë. Ane Hidalgo, kryebashkiakja e Parisit, është shprehur pro lejimit të atletëve rusë dhe bjellorusë në olimpiadë, ndonëse presidenti ukrainas, Zelenski, vijon të bëjë apel për ndalimin e pjesëmarrjes së tyre në kryeqytetin francez. “Mendoj që olimpiada është një moment sporti dhe nuk duhet t’i privojmë atletët nga ky eveniment. Por mendoj se nuk duhet të kemi një delegacion nën flamurin e Rusisë. Pra, sportistët mund të konkurrojnë si neutral pa simbole, edhe pse shpresoj që kur të presim Lojëra Olimpike, lufta në Ukrainë të jetë diçka që i përket së shkuarës”, është shprehur franko-spanjollja, kryebashkiake e Parisit. Së fundmi edhe Komiteti Olimpik
Ndërkombëtar (IOC) ka dalë me një qëndrim të qartë në të cilin bën të ditur se “asnjë atlet nuk duhet të ndalohet për të konkurruar për shkak të pasaportës që mban”, duke shprehur pozicionimin për dhënien e dritës jeshile për rusët dhe bjellorusët që të garojnë në eventet kualifikuese që të çojnë në Paris. Së fundmi gjithashtu një numër i madh anëtarësh së IOC, përfaqësues federatash dhe komitetesh olimpike, janë deklaruar në favor të prezencës së rusëve dhe bjellorusëve në Francë. “Qeveritë nuk duhet të vendosin se cilët atletë të marrin pjesë në olimpiada dhe cilët jo”, është qëndrimi unison i shumë anëtarëve të Komitetit Olimpik Ndërkombëtar. Tashmë do të jetë në dorën e federatave ndërkombëtare të përcaktojnë se cilët sportistë mund të marrin pjesë në Lojërat Olimpike “Paris 2024”.