4 të mbijetuar nga Interi i titullit, skuadra e Kontes drejt shkatërrimit

SHpallja kampion Italie e Interit në 2020-2021 i është atribuuar shpesh Antonio Kontes dhe mentalitetit që trajneri i transmetoi skuadrës. Përveç trajnerit, të gjithë tifozët zikaltër i kujtojnë fare mirë lojtarët titullarë të atij sezoni, formacionin e përhershëm, të cilit italiani i qëndronte besnik thuajse në çdo ndeshje. Siguria që ofronin titullarët e triumfit, Interi, ama nuk e ka gjetur më, ndoshta një nga arsyet për të cilat ekipi nuk duket më në rrugën e duhur. Largimi i Kontes në verën e 2021-shit është pasuar nga largimet e Hakimit e Lukakut, dy nga lojtarët kryesorë të suksesit dhe të larguar të dy për shkak të bilanceve, me belgun që kërkoi po ashtu të provonte një eksperiencë të re. Bashkë me ta, po në të njëjtën periudhë u detyrua të linte skuadrën edhe Kristian Eriksen për shkaqet shëndetësore që tashmë i njohim të gjithë. Një vit më pas edhe Ivan Perisiç zgjodhi të vazhdonte karrierën në një tjetër klub pasi i skadoi kontrata me Interin, rrugën e të cilit pritet ta ndjekin këtë verë edhe Milan Shkriniar, Stefan de Vraj e Samir Handanoviç, të tre në skadencë kontrate me sllovakun, që është thuajse i PSG-SË, ndërkohë që holandezi dhe portieri nuk kanë vendosur akoma për të ardhmen e tyre.

TË MBIJETUARIT - Në një situatë të tillë, në qershor do të jenë të paktë ata që e njohin rrugën drejt suksesit në ekipin zikaltër, më saktë vetëm 4 ose më keq akoma, 3 nga skuadra që dërgoi Interin drejt titullit: Bastoni, Barela, Brozoviç e Lautaro. Dy italianët konsiderohen shtylla të së tashmes dhe të së ardhmes, me mbrojtësin që po bëhet gati për të zgjatur kontratën e tij që skadon në 2024 dhe me mesfushorin që rinovoi vetëm një vit më parë deri në 2026 dhe është projektuar kapiten. Sipas vjetërsisë në skuadër shiriti në fakt do t’i takonte Brozoviçit, por e ardhmja e kroatit është ende në pikëpyetje dhe Barela duket një zgjedhje e padiskutueshme. I fundit i shpëtuar dhe i vetmi që është një garanci në repartin ofensiv është Lautaro Martinez, ndër të vetmit performanca e të cilit ka ardhur në rritje pas titullit. Revolucioni që ka pësuar organika e Interit, ka sjellë deri më tani dy Supekrupa dhe një Kupë Italie, ashtu si dy kualifikime të njëpasnjëshme në fazën e 1/8-ave të Champions League, por titulli është utopi edhe këtë vit dhe tani pritet të shikohet çfarë Interi do të paraqitet në 2023-2024.