Ançeloti është makthi i Simeones
Italiani numëron 8 fitore ndaj “Cholos” dhe i ka shkaktuar tri eliminime Eliminimi i fundit e lë Atletikon pa shanse për të fituar ndonjë trofe këtë sezon “Magjistari” Karlo, kthen sërish ndeshjen me zëvendësimet e bëra
Për të pambarimtën herë, numri një i stolit të Realit të Madridit, Karlo Ançeloti, ka treguar se është nga ajo racë trajnerësh që e kuptojnë se kanë gabuar dhe me 2-3 lëvizje arrijnë të kthejnë fatet e takimit në favorin e tyre. Ashtu siç ndodhi edhe në fazën e 1/8-ave në finalet në Kupën e Mbretit kundër Vijarrealit, vendimet taktike nga pankina e shpëtuan sërish Realin e Madridit nga një eliminim i dhimbshëm. Në Vijarreal, një javë më parë, Reali e shihte vetën në disavantazh të dyfishtë në fundin e pjesës së parë, por me lëvizjet në stol, tekniku i Realit ndryshoi fatin e takimit, me “Los Blancos” që në një pjesë loje përmbysën shifrat në 3-2. Historia është përsëritur ndaj Atletikos së Madridit. Pjesa e parë ishte për t’u harruar për Realin, që ndodhej në disavantazh të një goli. Por në pjesën e dytë, me hedhjen në fushë të Dani Sebajos e Rodrigos, situata ndryshoi. Të dy lojtarët ishin vendimtarë për Realin, veçanërisht Rodrigo, i cili me golin e barazimit i dha mundësinë skuadrës të shkonte në shtesë, e më pas të përmbyste gjithçka. Në hedhjen e Sebajosit në fushë, Ançeloti në fakt u detyrua nga dëmtimi i Mendit. Por me zgjidhjet që i dha skuadrës në fushë dhe me ndryshimin në vendosjen në fushë, Ançeloti luajti një rol thelbësor. Për të ardhur më pas te Rodrigo, “goditja” e madhe e Karletos mbrëmjen e së enjtes. Braziliani galvanizoi sulmin e Realit dhe i krijoi shumë probleme Atletikos. I mrekullueshëm goli i barazimit prej tij, që i hapi rrugën përmbysjes së madhe të “Los Blancos” në kohën shtesë. Reali është në gjysmëfinale për shkak të lojtarëve të tij, por edhe për shkak të ideve të trajnerit.
Për mua do të ishte diçka e bukur të qëndroja gjithnjë në krah të Ançelotit dhe të mësoja prej tij”. Kjo është një frazë të cilën trajneri i Atletikos së Madridit, Diego Simeone, e ka përdorur për të përshkruar rivalin e tij në stolin e Realit, Karlo Ançelotin. Por edhe pse është përballur shumë herë me italianin, edhe pse e merr gjithnjë si referencë, duket sikur “Cholo” Simeone nuk ka mësuar diçka të rëndësishme: si ta mundë Ançelotin në ndeshjet që vlejnë më shumë. Të enjten në mbrëmje, ai ka pësuar disfatën e radhës kundër italianit në çerekfinalet e Kupës së Mbretit. Në pjesën e parë gjithçka fliste për argjentinasin e Atletikos, me “Colchoneros” që kryesonin 0-1 në “Bernabeu”. Në fund gjithsesi triumfoi “Ujku i Vjetër”. Reali përmbysi Atletikon 3-1 pas kohës shtesë, duke siguruar një vend në gjysmëfinalet e Kupës së Mbretit. Ançeloti në këtë mënyrë është kthyer në një makth të vërtetë për Simeonen. Bilanci mes dy trajnerëve në përballjet e tyre është shumë i barabartë, por goditjet e italianit kanë qenë shumë të forta dhe më dëmbërës për Simeonen: e ka mundur njëherë në një finale në Ligën e Kampioneve, e ka eliminuar tri herë nga një kompeticion (dy herë në Kupën e Mbretit dhe njëherë në Champions). Dhe që nga e enjtja në mbrëmje Ançeloti është bërë trajneri i dytë që më shumë herë e ka mundur në histori Simeonen, 8 herë. Vetëm Luis Enrike e ka mundur më shumë argjentinasin e Atletikos, në 9 raste. Pas derbit në “Bernabeu”, Ançeloti hyri në historinë e Simeones si trajneri që argjentinasi është përballur më së shumti: 19 duele mes tyre (17 me Madridin dhe 2 me Bajernin), tetë fitore për Karleton, shtatë për “Cholo”-n dhe katër barazime. Derbi i së enjtes përmbysi bilancin në favor të trajnerit të bardhë, të cilit i ka mbetur edhe një betejë me Simeone këtë sezon, në fazën e dytë në La Liga. Ajo në çerekfinalen e Kupës së Mbretit është fitorja e tretë e Ançelotit në katër duelet kundër Atletikos që nga rikthimi i tij në drejtimin e Realit të Madridit. Eliminimi i fundit është veçanërisht i dhimbshëm për
Simeonen, sepse dalja nga Kupa e Mbretit e lë Atletikon pa asnjë shans për të fituar ndonjë titull në këtë sezon: jashtë Evropës, jashtë Kupës së Mbretit dhe me shanse është vetëm matematikë për të triumfuar në La Liga.