Dinamo kampione dimri, por sa shumë vuajtje me Luzin!
Autogoli i Imamit dhe i kuqi i Vokrrit futën “ethet”
Dinamo kalon Luzin dhe e mbyll fazën e parë si kampione dimri. Blutë fituan një ndeshje që e komplikuan vetë, pas atij autogoli të Imamit dhe daljen më të kuq të Vokrrit. E megjithatë, në fund morën çka deshën. Kryesojnë 3 pikë të shkëputur dhe prapa nuk kanë më Flamurtarin, por Korabin dhe Skënderbeun.
PJESA E PARË - Start i mirë i kryeqytetasve, që gjejnë golin pas vetëm 5 minutash. Denison vepron bukur në hyrje të zonës dhe pason për Danajn, që e përcjell topin në rrjetë, duke e kaluar Dinamon në avantazh. Loja vazhdon me një dominim të lehtë të bluve, që godasin traversën e Luzit dhe në këtë rast pretendojnë se topi ka kaluar vijën, madje edhe për penallti, por asnjë nga këto nuk qëndron sipas arbitrit kryesor. Luzi përpiqet të bëjë diçka dhe baraspeshon lojën, por ndëshkohet sërish. Danaj humb një rast përballë Fuçisë, por 2 minuta më pas nuk e ka të vështirë të dërgojë në rrjetë një asist të Bardhit nga e djathta. Me avantazhin 2-0 Dinamo shkon e qetë në dhomat e zhveshjes për pushimin, kurse te Luzi ankohen për një penallti të mohuar.
Në pjesën e dytë situata komplikohet papritur për blutë. Luzi shtyn përpara, fiton dy goditje dënimi afër portës dhe në njërën prej tyre Imami devijon me kokë gjuajtjen e Merdinit, duke e çuar topin në rrjetën e tij.
PJESA E DYTË -
Miqtë fitojnë besim dhe fillojnë të kërkojnë më shumë pas 2-1shit. Dalipi kërkon të ruajë rezultatin dhe largon nga fusha dy sulmuesit Denison e T.marku për Rrapin dhe Preloshin. Por llogaritë e tij komplikohen edhe më shumë, sepse dy minuta më pas Vokrri gabon
me një ndërhyrje të ashpër dhe merr kartonin e dytë të verdhë, duke e lënë skuadrën me 10 vetë. Luzi sulmon më fort për të shkuar te barazimi, blutë mbrohen me të gjitha mënyrat. Në fushë janë edhe Fetaj e Allmuça për Bardhin dhe Danajn. Në fund futet
edhe Jaku, duke marrë vendin e Rrapit që kishte hyrë si zëvendësues dhe luante për herë të parë me Dinamon. Pritjet e Bakajt dhe nxitimi i lojtarëve të Luzit bëjnë që ndeshja të mbyllet 2-1 mes drithërimash për kryeqytetasit, që tani mendojnë për Orikun.