Danaj: Ky vit më ka nisur mbarë, na duhej kjo fitore

Redon Danaj është njeriu i momentit te Dinamo. Viti 2023 ka nisur në mënyrën më të mirë për lezhjanin, që ka shënuar 3 gola, aq sa blutë kanë shënuar në total në dy ndeshjet e luajtura në muajin janar (ajo kundër Kastriotit në Kupën e Shqipërisë dhe tani me Luzin në kampionat). Dhe të tre këta gola i ka realizuar në të njëjtën portë të stadiumit “Selman Stërmasi”. Pas ndeshjes 22-vjeçari është shprehur i lumtur për dopietën dhe fitoren, por kishte dhe pak mërzi për faktin që vëllai i tij kishte humbur me Besëlidhjen. “Ndihem i lumtur për golat që shënova në këtë ndeshje, por edhe për ekipin, sepse kemi marrë një fitore shumë të rëndësishme. Na duhej një fitore në kampionat për këtë rinisje të tij në 2023-shin pas situatës që kemi kaluar. Tani qëllimi ynë është të vazhdojmë kështu, me trepikësha dhe me sa më shumë gola. Kartoni i kuq na dënoi pak në lojën tonë, por edhe ekipi kundërshtar kishte cilësi, këtë nuk duhet ta mohojmë. E përsëris, rëndësi ka që ia dolëm për objektivin e fitores, që për ne ishte e domosdoshme. Pozicioni i ri? Jo, thjesht unë dhe Denison ndërrojmë vendet gjatë lojës, nuk është një pozicion i ri për mua. Ka qenë rastësi ndoshta që më ka kapur më shumë loja përpara në sulm. Jam shumë i lumtur që ky vit më ka nisur shumë mbarë dhe shpresoj që të vazhdoj kështu, duke shënuar gola për Dinamon. Dedikim? Jo, asnjë dedikim, jam pak i mërzitur për vëllain që ka humbur në Lezhë”, ka thënë Danaj për gazetën. Ai ka shënuar edhe dy gola të tjerë në kampionat për blutë, në barazimin 1-1 me Tomorin në Berat dhe në fitoren e thellë 5-0 ndaj Lushnjës në kryeqytet.