Dygolësh dhe oferta, Uzuni do të qëndrojë te Granada
Faqja e La Liga 2 i vendos kurorë dhe e quan “miti” Myrto
Myrto Uzuni vazh don të dhurojë spektakël në La Liga 2, duke u bërë sërish protagonist kryesor dhe ka ndihmuar skuadrën e Granadës të sigurojë një tjetër fitore duke tundur rrjetën. Ashtu siç është bërë zakon, sulmuesi ka shkëlqyer në ndeshjen e skuadrës së tij në fushën e saj këtë fundjavë, duke shënuar 2 gola në suksesin 2-0 ndaj skuadrës së Pikesë, Andorra. Teksa aktivizimi i tij ishte në dyshim për shkak të një lëndimi që e la dy ndeshje jashtë, sulmuesi e nisi titullar duke surprizuar tifozët. Shenjat erdhën menjëherë, ku Uzuni shënoi dy herë që në minutat e parë të duelit, duke ia bërë më të thjeshtë ekipit të tij suksesin që e ngjiti në vendin e katërt në klasifikim. Goli i parë ishte një aksion individual spektakolar, ku ai shmangu edhe portierin dhe një gjuajtje nga një kënd i pamundur i tij solli avantazhin, ndërsa i dyti ishte me një asist perfekt të Kajehon, që e nxori përpara portës. Për arsye që të mos rrezikohej, ndeshja për beratasin përfundoi në minutën e 65-të. Kështu, sulmuesi shqiptar shkon në kuotën e 14 golave në këtë kampionat, duke udhëhequr listën e golashënuesve më të mirë të ligës së dytë spanjolle, edhe pse mungoi në dy ndeshjet e para. E veçanta është se të gjithë golat Uzuni i ka shënuar në “Los Karmenes” (stadiumi i Granadës). Ndërkohë sa i përket takimit, përfundoi 2-0 dhe nuk pati asnjë ndryshim tjetër.
“BOMBA” E MERKATOS
Myrto Uzuni ka qenë personazhi kryesor i kësaj fundjave në La Liga 2, pasi me dy golat e tij ndihmoi Granadën të fitonte një ndeshje të komplikuar përballë Andorrës. Sulmuesi shqiptar kësisoj regjistroi sezonin e tij më të mirë në karrierë, me 14 gola të shënuar në një kampionat, duke u konfirmuar në një formë të shkëlqyer. Paraqitje të cilat i shtohen të mëparshmeve dhe që kanë bërë të zgjohet interesi i klubeve të rëndësishme. Nëse fillimisht flitej për skuadra të La Liga-s si Betis apo Sevija, që po monitoronin lojtarin e Kombëtares shqiptare, ditët e fundit nga Spanja ka ardhur edhe lajmi se Gallatasaraji, Lids dhe Brentfordi po monitorojnë lojtarin. Por po nga Spanja, prestigjiozja “AS” bën të ditur se Uzuni nuk do të ndryshojë skuadër gjatë janarit. Në fakt, ka qenë vetë futbollisti ai i cili ka bërë të qartë gjatë kësaj periudhe se nuk mendon të largohet nga Granada, pasi dëshiron të kthehet në La Liga si protagonist me këtë ekip, duke qenë se provoi shijen e saj në sezonin e kaluar. Uzuni nënshkroi rinovimin me Granadën në tetorin e vitit 2022, teksa u vendosën edhe klauzola largimi të veçanta për cilindo klub që dëshiron lojtarin. Nëse Uzuni kërkon të largohet drejt një skuadre tjetër me Granadën si pjesë e La Liga 2, atëherë klauzola e tij vlen 12 milionë euro. Por nëse Granada siguron ngjitjen në La Liga, atëherë vlera e klauzolës së tij shkon në 18 milionë euro.