Mbrojtja fut ujë, dorëzohet “talebani” Pioli
Edhe “talebani” i fundit i skemës së titullit u dorëzuar. Stefano Pioli pranoi publikisht pas humbjes me Sasuolon se do të ndryshojë skemë. Me gjasa Milani në derbi do të rreshtohet me 4-3-3 për të mbushur mesfushën ku pritet të luajnë Tonali, Benaser dhe Kruniç. Misioni kryesor ndaj Interit do të jetë që të mos pësohen e më pas të tentohet diçka në sulm.
LOJA – Sandro Tonali, si kapiten i së ardhmes, por edhe milanist që nga fëmijëria, prej disa ndeshjesh shkon t’i kërkojë falje tifozëve ultras. Mbështetja nuk ka ndryshuar, por situata nuk do të vijojë të jetë e paqtë mes palëve nëse ndaj Interit do të mjaftojë një top mes linjave për t’u ndëshkuar përsëri. Milani është më i brishtë se kurrë e mjafton pak presion i rivalit që të shkërmoqet në sekondë. Kuqezinjtë nuk ndihmojnë njëri-tjetrin, vrapojnë pak e keq, e të gjithë e kanë të vështirë të gjejnë një shok të lirë. Një nga shkaqet kryesore, sipas ekspertëve të sektorit, është zgjedhja e Piolit për të mos ndërtuar më nga prapavija. Faj i këmbëve të Tatarushanusë, por edhe i regjisorit që nuk rreshket më mes mbrojtësve për të nisur manovrën. Sporadikisht e bën Benaserit, por ekipi nuk përgjigjet me lëvizjet përkatëse, ndaj edhe topi i gjatë është shndërruar në një normalitet. Kjo ka shpërfytyruar lojën dhe e gërshetuar me rënien fizike të disa elementëve ka stisur krizën kuqezi.
PËRBALLË TË GJITHËVE
- Fakti është se pas leksioneve nga Interi, Lacio dhe Sasuolo, është koha për Milanin që të përpiqet të arnojë diçka. Flisnim për përplasje të drejtpërdrejta. Ata peshojnë, peshojnë vërtet. Sezonin e kaluar pas fazës së parë, Pioli kishte humbur në shtëpi kundër Napolit, barazuar kundër Juves dhe Interit dhe fitoi ndaj të gjithë të tjerëve. Rezultati u përmirësua edhe në fazën e dytë, me vetëm barazimin ndaj bardhezinjve Milani përshkoi një rrugë që nuk mund të ishte më e bukur se aq. Aktualisht, në barazi pikësh me Lacion dhe Atalanta, praktikisht në vendin e tretë, Milani rrëshqet nga zona e Champions-it për shkak të rezultateve kundër kundërshtarëve të drejtpërdrejtë. Pas iluzionit të fitores së dyfishtë ndaj Interit dhe Juves, në fakt, ishte koha për të shënuar barazimin ndaj Atalantës, barazimin ndaj Romës (një përmbysje e pësuar në atë rast) dhe rezultatin e “Olimpico”-s ndaj Lacios. E cila, e parë ndryshe, do të thotë se ndërsa një vit më parë ekzistonte vetëdija për të qenë më të fortë se kushdo, sot ndjesia është ajo e të mos qenit më i mirë se askush. Ndjesi që në kohët e fundit është kthyer në siguri.