“Top Gun”, ja cili është sekreti i Artetës në suksesin e Arsenalit
Mikel Arteta ka bërë një punë të pabesueshme në udhëheqjen e Arsenalit në krye të Premier Ligës. Dhe kontributet e një 27vjeçari kanë qenë çelësi i rikthimi të “Topçinjve” në garën për titull. Por nuk bëhet fjalë për ndonjë nga lojtarët e tij. Në fakt, personi në fjalë është trajneri Karlos Kuesta, i cili ka luajtur një rol vendimtar deri tani në sezonin e londinezëve. 27-vjeçari është Trajneri i Zhvillimit Individual tek Arsenali dhe punon me lojtarët një e nga një për t’i ndihmuar në përmirësimin e lojës së tyre. Spanjolli iu bashkua “Topçinjve” në vitin 2020, menjëherë sapo ata fituan Kupën FA. Ai është një pjesëtar i paçmueshëm i stafit të Artetës. Kuesta zotëron licencën UEFA Pro, ndërsa ka nisur të marrë stemat e trajnerit që në moshën 18-vjeçare. Kuesta mund të flasë edhe 6 gjuhë të ndryshme, përfshirë anglishten, spanjishten, italishten, portugalishten, frëngjishten dhe atë katalanase. Kjo do të thotë se ai mund të komunikojë me lojtarët në mënyrë efikase në rast se anglishtja nuk është gjuha e tyre e parë. Mbrojtësi i majtë, Nunjo Tavaresh, aktualisht i huazuar te Marseja, i ka thurur elozhe më herët Kuestës për punën e tij në “Emirates”. Në dokumentarin e “Amazon”, “Gjithçka ose Asgjë”, Tavaresh tregon: “Karlos mund të kuptojë lojtarët sepse ai është gjithashtu shumë i ri në moshë. Ai më ndihmon që të përmirësohem”. Fokusi i Kuestës është në aspektin teknik dhe taktik të ndeshjes, ku Arsenali ka bërë hapa gjigantë këtë sezon. “Topçinjtë” kryesojnë +5 nga vendi i dytë, Mançester Siti, ndërsa kanë edhe një ndeshje më tepër në dispozicion sesa kampionët e Guardiolës dhe mund ta thellojnë avantazhin në 8 pikë. Arsenali dhe Mançester Siti nuk janë përballur ende këtë sezon në Premier Ligë dhe për këtë arsye, letrat mbeten ende të hapura. Ato u përballën të premten për herë të parë këtë sezon në Kupën FA, ku fitoi skuadra e Guardiolës 1-0 falë një goli të Akes.