Liga Gjergj Kastrioti mbyll grupet me dy rezultate tavoline

Liga Gjergj Kastrioti, kompeticion për klube në volejboll ndërmjet Shqipërisë dhe Kosovës ka përfunduar fazën e grupeve, duke mësuar tashmë edhe skuadrat gjysmëfinaliste. Por java e gjashtë e grupeve nuk është mbyllur në mënyrën më të mirë, teksa janë shënuar dy rezultate tavoline. Te femrat ekipi kosovar M.technologie nuk ka udhëtuar drejt kryeqytetit të Shqipërisë për ndeshjen ndaj Tiranës. Ndërsa në radhët e meshkujve është Tirana që nuk e ka marrë mundimin për të udhëtuar në transfertën kosovare kundër Skënderbeut. Ndeshje këto që kanë pasur vetëm vlerë statistikore, duke qenë se llogaritë e kualifikimit ishin mbyllur. Duke kaluar te rezultatet, në Grupin A për femra Skënderbej mundi Partizanin 3-1, duke u kualifikuar si vend i parë, ndërsa të kuqet e mbyllin të dytat. Në takimin tjetër të këtij grupi, siç e thamë edhe më lart, Tirana mundi 3-0 në tavolinë ekipin prishtinas M.technologie. Për sa i përket Grupit B, Skënderbeu fitoi 3-1 në shtëpi ndaj Dritës së Gjilanit për ta mbyllur në vend të parë, ndërsa Fer Volej mposhti 3-0 Vllazninë duke u kualifikuar si vend i dytë. Tashmë në gjysmëfinale do të kemi dy ndeshje derbi, atë të Shqipërisë mes Partizanit dhe Skënderbeut dhe atë kosovar ndërmjet Skënderajt dhe Fer Volejt. Për sa u përket meshkujve, në Grupin A, Peja mundi në transfertë Erzenin me rezultatin 2-3, por shijakasit e ruajnë vendin e parë, ndërsa pejanët avancojnë më tej si të dytët. Tirana nuk u paraqit në transfertën kosovare kundër Skënderbeut, duke e humbur takimin në tavolinë. Në Grupin B, Partizani koleksionoi suksesin e pestë. “Demat” këtë herë mundën në shtëpi Lubotenin në shifrat 3-1, duke e prerë biletën e gjysmëfinaleve si vend i parë. Në takimin tjetër të këtij grupi, Ferizaj mundi 3-2 Vllazninë dhe kualifikohet si vend i dytë. Kështu në gjysmëfinale do të kemi përballjet Erzeni-ferzaj dhe Partizani-peja.