Rimal Haxhiu firmos për Tiranën, Ismajlgeci prezantohet te Zrinjski
Kapiteni shitet për 150 mijë euro në Bosnjë, stafi teknik kundër
Futbollisti Rimal Haxhiu është zyrtarisht futbollist i Tiranës. Burime për “Panorama Sport” bëjnë me dije se ai ka firmosur kontratën me bardheblutë dhe do të jetë lojtari më i ri i kampionëve. Futbollisti ka firmosur një marrëveshje 3-vjeçare dhe do të dalë sot në stërvitje, duke mbështetur bardheblutë në dy krahët e mbrojtjes. Futbollisti 23vjeçar, Haxhiu, e njeh mirë kampionatin shqiptar pasi sezonin e fundit ka qenë pjesë e ekipit të Kukësit, Dinamos, teksa ka luajtur edhe me Apoloninë në Superiore. Ai mund të luajë te Tirana në të gjithë krahët, duke qenë një zëvendësues ideal në skuadër. Haxhiu ka qenë pothuajse rregullisht në formacionin e parë duke luajtur në të gjithë krahun e djathtë të fushës, si në mbrojtje, ashtu edhe përpara në 17 ndeshje këtë sezon. Lojtari është aktivizuar edhe 1383 minuta në Superiore, pa llogaritur ndeshjet e Kupës së Shqipërisë. KAPITENI - Mbrojtësi i Tiranës, Marsel Ismajlgeci, është futbollisti
më i ri i Zrinjski Mostar në Bosnjë dhe Hercegovinë. Lajmi është bërë i ditur nga vetë klubi përmes një postimi në faqen zyrtare të klubit. Gjithashtu raportohet se Ismajlgeci ka firmosur një kontratë deri në vitin 2026. Marrëveshja është mbyllur për shumën 150 mijë euro,
ndërsa lojtari ka udhëtuar që dje drejt Bosnjës. Një transferim që nuk është pritur mirë nga trajneri Orges Shehi dhe stafi teknik që ka thënë jo për këtë transferim, por nuk është dëgjuar nga presidenca bardheblu. “Zrinjski Mostar dhe KF Tirana kanë rënë dakord për transferimin
e mbrojtësit të majtë 22vjeçar Marsel Ismajlgeci, i cili dje ka nënshkruar kontratën deri në fund të sezonit 2025-2026. Kapiteni i kampionëve të Shqipërisë ka 122 paraqitje zyrtare me fanellën e KF Tiranës, duke shënuar 10 gola dhe 14 asiste, gjithashtu dy paraqitje në Kombëtaren
A. Në vitin 2021 Federata Shqiptare e Futbollit e zgjodhi atë si lojtarin më të mirë të ri në Shqipëri”, shkruante klubi boshnjak. Amir Gross Kabiri, nënkryetari i Zrinjskit, pas marrëveshjes tha: “Jemi të kënaqur me forcimin e Marsel Ismajlgecit, që i përshtatet strategjisë dhe objektivave tona. Ne do të vazhdojmë të forcojmë ekipin tonë për të përmbushur pritjet dhe për të arritur qëllimet e planifikuara”. Ismajlgeci është kapiteni i katërt rresht që i largohet bardhebluve që prej 2020-ës, pas Karabecit, Bathës e Hoxhallarit.