“Bis” në limite, Skënderbeu merr dy talente në Nigeri
“Blindohet” Skënderbeu. Klubi ka siguruar shërbimet e dy afrikanëve dhe mbyll zyrtarisht merkaton. Burime të sigurta për “Panorama Sport” konfirmojnë se drejtuesit kanë federuar në limite nigerianët Godvir Savior dhe Moses Junior. Duke parë moshën e tyre të re dhe të dhënat që zotërojnë, drejtuesit i kanë lidhur kontrata afatgjata. Kanë nënshkruar marrëveshje 4-vjeçare, pasi shihen si elementë të perspektivës. Savior është 19 vjeç dhe luan si mesfushor qendre. Ndërsa nga ana tjetër, edhe Moses është gjithashtu 19-vjeçar
dhe luan si sulmues i majtë. Ai dallohet për shpejtësinë e tij, e cila është arma e fortë e këtij lojtari. Me afrimet e dy futbollistëve nga Afrika, bardhekuqtë janë totalisht gati për të përballuar garën. Jo vetëm që kanë një formacion, i cili jep garanci, por edhe alternativa më
shumë se cilësore. Lojtarët janë vënë nën urdhrat e trajnerit Ivan Gvozdenoviç që nga dita e djeshme, e megjithatë mbetet për t’u parë nëse do të debutojnë në dy ndeshjet e kësaj jave për llogari të Kupës dhe kampionatit. Me ta shkon në 6 numri i përforcimeve në këtë dritare transferimesh. Kujtojmë që më herët kanë marrë Randi Dumfur, Agnaldo Moraesh, Hektor Idrizajn dhe Erald Hysenin. Që organika të jetë totalisht e gatshme për stafin teknik, duhet të rikthehen Dritmir Beci dhe Oltjon Rapa. Dy prej lojtarëve që mund të mbajnë një peshë jo të vogël në prapavijë, nuk janë gati. Shkodrani është i ndalur në infermieri prej kohësh dhe ende nuk ka një sinjal se kur mund të rikuperohet. Në këto çaste, mbrojtja është reparti më i boshatisur aktualisht dhe kjo vjen prej dëmtimeve.