Kaloshi “shkund” Lushnjën: Janë edhe 39 pikë në lojë
Portieri nuk heq dorë nga mbijetesa: Dhamë shenja jete në Korçë
Lushnja ka “arkivuar” Skënderbeun dhe është përqendruar te Kupa e Shqipërisë. Të enjten vijnë në kryeqytet, ku i pret Tirana. Ndonëse nuk kanë pretendime dhe as shanse për të shkuar më tej (pas humbjes 3-0 në “Roza Haxhiu”), duan ta shfrytëzojnë këtë 90-minutësh për t’u rritur. Këtë e thotë edhe Mikel Kaloshi, i cili paralajmëron se do të shohim një tjetër ekip në fushë. Gjatë një deklarate të dhënë për “Panorama Sport”, gardiani ndalet edhe te kampionati. Nuk ka në plan që të heqë dorë nga mbijetesa dhe sidomos kur në lojë janë edhe 39 pikë. “Do të jetë një Lushnjë serioze. Po përgatitemi dhe e kemi vlerësuar takimin. Në ndeshje të tilla ka ndryshime dhe pavarësisht se kush do të aktivizohet, do të jetë një tjetër ekip dhe paraqitje. Do të jemi korrektë me veten mbi të gjitha. Edhe pse vëmendjen e kemi te kampionati, në fushë do të na shihni të angazhuar maksimalisht”, tha fillimisht 29-vjeçari, që më tej komentoi edhe humbjen në Korçë. “Vërtetë humbëm me Skënderbeun, por mendoj se skuadra dha shenjat e para të ‘jetës’. Kemi ndryshuar nën drejtimin e trajnerit Klevis Dalipi, më besoni. Ishim duke u bërë një rezistencë të mirë bardhekuqve, por u ndëshkuam nga gabime në përqendrim. Pësuam një gol aksidental, me devijim, dhe në futboll ndodhin këto gjëra. Ishim në fushën e një prej skuadrave më të forta dhe pretendente për Superioren. Kryesorja është që kemi bërë një lojë të mirë në Korçë. Ekipi ka ngritje si nga ana fizike ashtu edhe nga ana taktike. Mendoj do të vijmë duke u përmirësuar, sepse po punojmë maksimalisht që të rritemi dhe të eliminojmë gabimet. Ne do të shikojmë përpara. Kemi një rrugë të gjatë në kampionat dhe javët do t’i marrim një e nga një. Janë 39 pikë në lojë, ndaj të grumbullojmë sa më shumë dhe dalim nga situata në të cilën ndodhemi”, përfundoi Kaloshi.