“Godet” Flamurtari, firmos Pedro që shkëlqeu... vjet
Blindohet porta, vjen Klajdi Kuka nga Laçi në formë huazimi
Flamurtari rikthen në futbollin shqiptar një prej sulmuesve më të mirë të sezonit të kaluar në Superiore, brazilianin Pedro Augusto Kabral. 23vjeçari u bë i njohur tek Egnatia në sezonin 2021-2022, ku në 26 ndeshje të aktivizuara në kampionat, arriti të shënojë 10 gola, duke qenë golashënuesi më i mirë i rrogozhinasve. Pas një periudhe përplasjesh për kontratën mes tij dhe klubit rrogozhinas, Pedro nuk u kthye më tek Egnatia, që kërkonte 100 mijë euro dëmshpërblim pasi pretendonte se braziliani nuk kishte respektuar marrëveshjen. Mirëpo, dje klubi i Flamurtarit prezantoi brazilianin. “Pedro Augusto është zyrtarisht futbollist i Flamurtari Football Club. Mirë se vjen në familjen e madhe kuqezi”, shkruhej në faqen zyrtare të vlonjatëve. Afrimi i Pedros, edhe pse prej shtatë muajsh ka qenë pa skuadër, është pa diskutim një goditje e madhe për Flamurtarin sa i përket fazës ofensive. Sulmuesi mund të bëjë diferencën në Kategorinë e Parë, në një kohë që këtë e ka treguar edhe në Superiore.
Pedro e ka nisur karrierën tek Amerika Mineiro në Brazil, për të vijuar tek Amerika RJ. Në vitin 2021 ai ka qenë pjesë e Paranës, ndërsa më pas erdhi për herë të parë në Shqipëri për llogari të Egnatias së Rrogozhinës.
PORTIERI
Flamurtari gjen më në fund portierin që i jep garanci për objektivin madhor që ka, ngjitjen në elitë. Dje, në ditën e fundit të merkatos, klubi vlonjat ka njoftuar huazimin e portierit Klajdi Kuka, i cili vjen nga Laçi, aty ku ka qenë rezervë. 32-vjeçari do të jetë pjesë e Flamurtarit deri në fund të këtij sezoni. Kuka është prodhim i akademisë së Tiranës, ndërsa ka një eksperiencë të madhe në të gjitha nivelet e futbollit shqiptar, duke luajtur për skuadra si Tirana, Tërbuni, Kastrioti, Turbina, Vora, Dinamo dhe Besa. Ai është 1.90 i gjatë, ndërsa do të jetë një alternativë më shumë në portën kuqezi. Ndërkaq, mësohet se portieri tjetër, Elgi Fejzo, i cili është stërvitur së fundmi me ekipin kuqezi, nuk e ka bindur stafin teknik.