Shpërthen Kukësi, Apolonia mezi mbledh 11 lojtarë
Berisha zëvendëson Bashën dhe menjëherë... shënon
Kukësi eviton sur prizat në Kupë dhe arrin të kalojë në çerekfinale, pasi ka eliminuar Apoloninë me një fitore bindëse në ndeshjen e kthimit, dje në “Kukës Arena”. Verilindorët kanë argëtuar afro 1 mijë tifozë të pranishëm në stadium, me një festival golash, plot 5. Ka rezultuar më e lehtë nga sa pritej kjo përballje, me një Apoloni që udhëton e dorëzuar në Kukës, duke e pasur mendjen më shumë te kampionati. Hallaçi nuk kurseu titullarët, i vetëdijshëm që çdo hap fals do të ishte i ndaluar, për më tepër që nëpërmjet Kupës, Kukësi sheh mundësinë e duhur për të shkuar në Europë.
PJESA E PARË
Kukësi e nis me një risi në formacion, pasi rikthehet pas tre muajsh dëmtim portieri Angelo Tafas, ndërsa Dovedan udhëton me vetëm 11 lojtarë, edhe ata kryesisht të rinj, duke mos pasur asnjë futbollist në dispozicion në stolin e rezervave. Ashtu siç pritej, është Kukësi ai që dikton lojën dhe hidhet që në minutat e para në sulm, në kërkim të golit të avantazhit,
ndërsa fierakët mundohen më shumë të mbrohen. Përpjekjet e vendësve do të konkretizohen në minutën e 18-të, me anë të Ergys Peposhit. Mesfushori përfiton nga një përgjumje në mbrojtje dhe i vetëm përballë portierit ia del që të tregohet i saktë, duke e ndalur topin në
rrjetë dhe qetësuar blutë. Një gol që ka vlerën e kualifikimit, pasi vetëm fitorja i dërgon në raundin tjetër. Sakaq, Apolonia has vështirësi për të dalë përpara, ku edhe në ato pak momente i mungon saktësia para portës. Verilindorët nuk pajtohen me vetëm një gol, pasi nuk ofron
siguri dhe vijojnë me sulmet, por goditja e dënimit e kapitenit Gjelbrim Taipi, nuk ka saktësinë e duhur. Gjithsesi, përpos përpjekjeve, fraksioni i parë i lojës mbyllet në avantazhin e vetëm një goli të Kukësit.
PJESA E DYTË
E dyta nis menjëherë me rrjetë,
teksa blutë shënojnë golin e qetësisë me anë të Gabriel Barbosës. Kombinim i bukur mes Bashës dhe brazilianit, teksa ky i fundit driblon edhe portierin dhe e dërgon sferën në rrjetë. 2-0 dhe praktikisht Kukësi e sheh veten në çerekfinale, edhe për shkak se Apolonia nuk ka forca për të reaguar, pasi nuk del dot nga zona dhe mundohet me të gjitha format vetëm të mos pësojë gola të tjerë. Me fitoren në “xhep”, Hallaçi nis të mendojë edhe për ndeshjen e kampionatit ndaj Vllaznisë, duke kryer zëvendësimet e para për t’i dhënë mundësinë lojtarëve
të rinj. Pikërisht, zëvendësimet japin menjëherë efektin brenda tre minutash, fillimisht me Domin dhe më pas me Berishën, duke i dërguar shifrat në 4-0. Berisha shënoi vetëm një minutë pasi u fut në fushë, duke zëvendësuar Bashën. Në fushë ka vetëm një skuadër dhe Kukësi shënon edhe të pestin, sërish me anë të Domit në të 82-ën, që brenda pak minutash realizon dopietën personale. Minutat e mbetura nuk sjellin gola të tjerë, me Kukësin që “shfryn” ndaj Apolonisë dhe pret me qetësi të mësojë rivalin në çerekfinale mes Teutës dhe Erzenit.