Çoçlli mbetet në staf, Dibra: Kthehemi me Turbinën
U dorëhoq si trajner, pranon ofertën si zëvendës Kapiteni: Kemi eksperiencën e duhur për t’iu larguar fundit
Nikolin Çoçlli nuk ikën nga Lezha. Edhe pse u dorëhoq si trajner, ka vendosur që të pranojë ofertën që iu bë nga klubi. Korçari do të jetë pjesë e stafit teknik për pjesën e dytë të këtij sezoni, konkretisht në rolin e zv.trajnerin. Ai zëvendëson kështu Hasan Hoxhën, që është larguar përfundimisht nga ky post. 54vjeçari do të jetë një ndihmë e madhe për Artan Banon, që prej së hënës ka marrë zyrtarisht “timonin”. Misioni për këtë kampionati do të jetë një dhe vetëm një: mbijetesa. Janë të fundit në renditje dhe vështirësia dihet, por te Besëlidhja asnjë nuk i ka humbur shpresat dhe sidomos kur në lojë janë 39 pikë.
KAPITENI
Si për të ndezur atmosferën dhe dhënë zemër grupit, vjen deklarata e kapitenit. Kledi Dibra paralajmëron për “Panorama Sport”, se kthesa do të nis këtë të diel. Presin Turbinën dhe llogaritë bëhen me fitoren. “Të dielën nis një tjetër kampionat për ne. Është edhe një fazë e plotë për të luajtur dhe 39 pikë në lojë, ndaj shanse kemi mjaftueshëm.
Presim Turbinën dhe do ta quaja një ndeshje ‘zjarri’. E them këtë, sepse nuk na lejohet të gabojmë. Ndaj cërrikasve vlen vetëm fitorja, as barazimi nuk na shërben. Po punojnë me intensitet për t’ia dalë. Javën stërvitore antiturbina e kemi nisur me trajner të ri, kështu që shpresoj shumë se do të ndikoj pozitivisht. Stërvitjen e kemi nisur mirë, po punohet me profesionalizëm për ta ngarkuar ekipin nga të gjitha pikëpamjet. Pak vështirësi paraqet lidhja dhe shkrirja e futbollistëve të ardhur rishtas në ekip, por shpresoj se deri të dielën do të mund të ndërtohet një formacion që do ta ndryshojë gjendjen. Kam besim se futbollistët e ardhur nga merkatoja e janarit do të japin atë për të cilën janë thirrur ‘nën armë’. Pozicioni në fund të tabelës nuk na shkon përshtat dhe duket i vështirë, por nuk ka vend për panik. Për një ekip me eksperiencë si Besëlidhja, ka vend për optimizëm. Kam besim se djemtë do të japin më të mirën duke nisur nga java e 14-të. Përvoja, talenti dhe dëshira në organikë nuk na mungojnë, ndaj kemi mundësinë që të marrim një trepikësh shpëtimi dhe shprese”, përfundoi mbrojtësi.