Mbape jashtë për 3 javë pas dëmtimit, mungon ndaj Bajernit

Fitorja në transfertën e vështirë ndaj Montpeliesë do të shkonte në plan dytësor pas lëndimit të pësuar nga ylli i tyre Kilië Mbape. Transalpini fillimisht kishte dështuar në tentativën në ekzekutimin e 11-metërshit, por e keqja e madhe ende nuk kishte ardhur. Vetëm pak çaste më vonë, ai do të pësonte lëndim në kofshën e majtë, çka do të thoshte zëvendësim të detyruar dhe largimi nga fusha e blertë mes dhimbjesh. Situata në fjalë nuk u shkon aspak për shtat parisienëve, të cilët historikisht në vitet e fundit në Ligën e Kampionëve e vuajnë pjesën e dëmtimeve në raunde të rëndësishme. Së fundmi nga kampionët e Ligë 1 është bërë e ditur se 24-vjeçari do të mungojë të paktën për një periudhë 3javore, çka do të thotë se përplasja e parë me Bajernin në

Champions mbi fazën me eliminim direkt do të luhet pa të. Goleadori është kthyer në protagonist këtë sezon me fanellën e "Princërve" dhe mungesa e tij do të ketë efekt në skuadër, ndonëse në gjirin e tyre ndodhen dy ikona të futbollit në vitet e fundit, fjala është për Lionel Mesin dhe Nejmarin. Kilië me shumë gjasa do të jetë gati në takimin e kthimit në Mynih, e parashikuar në datën 8 mars. Gjithashtu duhet theksuar se futbollisti me numër "7" në "Parc des Princes" se nuk do të jetë në dispozicion në sfidën e radhës ndaj Tuluz, Marsejë (Kupë), Monako, Bajern (Champions) dhe atë ndaj Lilës në fushën e vet. Ky version do të qëndrojë, nëse faza e rikuperimit nuk do të ketë probleme gjatë rehabilitimit nga golashënuesi i ligës franceze.