Gruda-sprint, Teuta në çerekfinale
Sulmuesi hyn në të 62-ën dhe shënon golin e kualifikimit, në turin tjetër me Kukësin Erzeni i pafuqishëm në ndeshjen e kthimit, mbyll aventurën në Kupën e Shqipërisë
Teuta kualifikohet në çerekfinalen e Kupës së Shqipërisë. Një gol me veprim individual të Ildi Grudës i ka dhënë durrsakëve fitoren minimale ndaj Erzenit dhe kalimin në raundin tjetër, duke qenë se takimi i parë kishte përfunduar 1-1. Në turin tjetër Teuta do të përballet me Kukësin.
PJESA E PARË- Me disa ndryshime e nisin të dyja skuadrat, duke qenë se në për pak ditë do të luhen edhe ndeshjet e kampionatit. Minutat e para në Niko Dovana janë të qeta, me tentativa shumë pak të rrezikshme. Kotobelli dhe Çyrbja provojnë, por Hasanbelli nuk shqetësohet. Mbrojtja e Erzenit provon me topa të gjatë drejt Nonatos, me brazilianin që markohet mirë dhe has vështirësi. Në vazhdim është Albion Marku që ikën bukur në krah dhe shërben për L.vilën, por ky i fundit godet fort dhe topi shkon mbi traversë. Teuta rrit presionin dhe një gabim i Vitor Leaos në të 42-ën mund t’i kushtonte shumë shijakasve. Mbrojtësi humbet topin në zonën e tij dhe aty është Beqja që godet, por nuk ndihmohet edhe nga terreni dhe goditja është e lehtë dhe jashtë. Me shifra të barabarta mbyllet pjesa e parë.
PJESA E DYTË- Kuro për Goxhan te Teuta. Ndërkohë, Erzeni mendon për zëvendësimet dhe hedh katër lojtarë në fushë. Ademi, Alan, Aliti dhe Isteri aktivizohen nga Xh.kapllani. Në minutën e 69-të, pas një aksioni të vendasve, Daci shënon, por anësori akordon pozicion jashtë loje, nuk vlen goli. Durrsakët zotërojnë dhe kanë kontrollin e lojës, me Erzenin që ka vështirësi që të krijojë, edhe pse ekipi mbahet lart. Nga kjo do të vijë edhe pësimi i golit. Një kundërsulm “vrasës”, nxjerr Grudën të vetëm që nga mesfusha e tij dhe vrapon për rreth 60 metra deri te zona kundërshtare dhe me qetësi dërgon topin në rrjetë, duke mposhtur portierin Hasanbelli. Në
minutat e fundit Erzeni mundohet të gjejë barazimin me krosime në zonë, por Qirko fluturon në dalje dhe largon rrezikun. Oshafi ka mundësinë e fundit për 2-0, ndërsa goditja lë për të dëshiruar. Mbyllet 1-0 në Durrës dhe Teuta kualifikohet.