Vllaznia kalon Bylisin, sfidon sërish Partizanin
Supergoli i Alivodës shoi shpresat e miqve për përmbysjen Kaçorri shënon dhe më pas lë ekipin me 10 veta për 11 minuta
Vllaznia barazon 1-1 me Bylisin në ndeshjen e kthimit dhe ia del të kualifikohet në çerekfinalet e Kupës së Shqipërisë. Fitorja 0-2 në sfidën e parë në Ballsh ka vendosur shumë për skuadrën që kaloi më tej dhe pavarësisht përpjekjeve të Bylisit, kuqeblutë e menaxhuan mirë lojën. Golit të Luis Kaçorrit iu përgjigj Rejan Alivoda, i cili finalizoi në mënyrë perfekte një aksion model. Miqtë rihapën shanset e kualifikimit, por vetëm 5 minuta pas golit, ishte pikërisht sulmuesi Kaçorri, ai që u ndëshkua me karton të kuq dhe zbehu shpresat për një përmbysje ose të paktën për të çuar ndeshjen në kohën shtesë. Kësisoj, Vllaznia shkon në çerekfinale, aty ku do të gjejë Partizanin për të dytin edicion radhazi. Ndeshja e parë do të luhet në Shkodër më 1 mars, ndërsa e kthimit më 15 mars në Tiranë. Vllaznia është fituesja në fuqi e Kupës së Shqipërisë prej dy edicionesh radhazi.
NDESHJA - Vllaznia dhe Bylisi kishin bërë pak ndryshime në formacion, duke vlerësuar në maksimum ndeshjen e kthimit, paçka se rezultati 0-2 në Ballsh u jepte një avantazh të madh shkodranëve. Loja nisi me një ritëm të lartë për miqtë, të cilët kërkojnë të shënojnë që në fillim. Me kalimin e minutave, shkodranët balancojnë gjithçka dhe nuk mungojnë as rastet para portave respektive. Fillimisht është Qardaku që gjen të lirë në zonë Felipe Sozën, i cili provon me një gjuajtje, por ndalet nga Qarri. Më pas është Alivoda që godet nga distanca, por topi përfundon mbi kuadrat. Në minutën e 21-të, shkodrani i Bylisit, Qardaku, godet brenda zonës, por topi shkon direkt në duart e Qarrit. Radhën e ka japonezi Doi, i cili kërkon të befasojë portierin e Vllaznisë, por nuk ka shënjestër. Vllaznia mund të shënonte në fundin e pjesës së parë pas një kombinimi mes Kainës, Heriçit dhe Krujës, por ky i fundit nuk konkretizon dot. Skuadrat shkojnë në pushim me rrjeta të paprekura. Në të dytën Vllaznia kërkon që të shënojë dhe Marku brenda zonës godet me kokë, por mbi traversë. Miqtë zgjohen përmes Qardakut, i cili godet fort, por mbi traversë. Në vijim është Çoba që pason saktë në hyrje të zonës për Krujën, i cili nuk gjen kuadratin. Loja bëhet e bukur dhe i sapofuturi në fushë, Lorran, provon me një gjuajtje nga distanca, por tentativa e tij ndalet nga Qarri. Në minutën e 74-t është Kaçorri që përfiton nga
një top i ngelur në zonë dhe e dërgon në rrjetë, duke kaluar Bylisin në avantazh. Ishte një gjuajtje e fortë e Qardakut, që pasi grushtohet nga Qarri, më pas Kaçorri me kokë e fut në rrjetë. Vllaznia mobilizohet për të mos rrezikuar më dhe barazimi vjen shpejt. Pas dy kartonëve të
verdhë, Kaçorri ndëshkohet me të kuq për ndërhyrje të parregullt ndaj Çobës. Në minutën e 84-t, është Alivoda që bën gjithçka mirë duke rrëmbyer një top nga mesi i fushës dhe më pas me galopin e tij drejt zonës, me një goditje të fortë me të djathtën, vulos barazimin 1-1.