Braktisi skuadrën, Kukësi fiton 46 mijë euro nga Vitija
Klubi i Kukësit pret të marrë plot 46 mijë euro nga ish-mbrojtësi Sadik Vitija. "Panorama Sport" zbulon ekskluzivisht se klubi verilindor ka fituar të drejtën në FIFA pasi e hodhi në gjyq për prishje të njëanshme të kontratës, me Dhomën e Zgjidhjes së Mosmarrëveshjeve, që i ka dhënë të drejtë bluve, duke hedhur poshtë edhe pretendimet e lojtarit. Sakaq, verilindorët kanë dalë pa gjë nga padia ndaj ish-kapitenit Besar Musolli, ndaj të cilit kërkohej gjithashtu një shumë prej 300 mijë eurosh për shkak se nuk pranoi vendimin e rinovimit automatik të kontratës.
VITIJA - Gazeta ka arritur të zbardhë vendimin e plotë të Dhomës së Zgjidhjes së Mosmarrëveshjeve në FIFA më 13 tetor 2021. Në këtë vendim citohet ndër të tjera, se ish-futbollisti i Kukësit, Sadik Vitija, duhet të paguajë klubin verilindor 46,000 euro si kompensim për shkelje të kontratës, plus 5% interes nga 3 janari 2022 deri në datën e pagesës efektive. Palës përgjegjëse/kundërpaditëse do t'i vendoset një kufizim për të luajtur në ndeshjet zyrtare deri në pagimin e shumave të duhura. Sakaq, nga ana tjetër, klubi i Kukësit duhet t'i paguajë 2000 euro si shpërblim i papaguar plus 5% interes që nga 11 nëntori 2021 deri në datën e pagesës efektive. Kujtojmë që Vitija luajti me Kukësin vetëm një ndeshje në Kupë ndaj Maliqit dhe u grumbullua vetëm në sfidën me Tiranën në kampionat. Nuk është rasti i parë që Kukësi del i fituar nga gjyqet ndërkombëtare me futbollistët, pasi edhe në të kaluarën ka një histori suksesi në këtë aspekt.
MUSOLLI - Nga ana tjetër, Kukësi nuk ka arritur të fitojë gjyqin me Besar Musollin, i cili nuk pranoi rinovimin automatik të kontratës, ndërkohë që klubi kërkonte 300 mijë euro dëmshpërblim, duke iu referuar edhe kushteve të kontratës të nënshkruara midis palëve. Për këtë arsye, futbollisti me më shumë prezenca në historinë e Kukësit, me plot 254 ndeshje të luajtura, u hodh në gjyq në FIFA nga klubi, ku në lojë hyn edhe skuadra e Gjilanit, e cila federoi futbollistin. 33-vjeçari kishte pretendimet e tij në FIFA, duke argumentuar se kishte njoftuar klubin për moszgjatjen
e kontratës, ndërsa klubi i mëshonte rinovimit automatik edhe për dy sezonet në vijim. Në fund, duke marrë parasysh arsyetimin e të dyja palëve, Dhoma e Zgjidhjes së Mosmarrëveshjeve vendosi: "Rrjedhimisht, DRC vendosi që kërkesa e paraqitësit të kërkesës, edhe pse e pranueshme, duhet të jetë refuzuar tërësisht", thuhej në pikën 74 të vendimit të kësaj dhome. Në argumentimin e saj thuhet se klubi i Kukësit nuk arrin të vërtetojë plotësisht që midis palëve duhej të kishte një rinovim automatik, ndaj si përfundim verilindorëve u jepet pjesërisht të drejtë, por pa dëmshpërblim.