Tomori, vjen një brazilian për të garantuar... golat
Tomori gjen sulmues në fundin e merkatos. Dje në Berat është prezantuar braziliani Guilherme Kaian, i cili është 22 vjeç dhe vjen pas aktivizimit në vendin e tij me klube si Manthikuera, Audaks dhe Juventus-sp. Burime në klubin beratas tregojnë për “Panorama Sport” se Kaian është federuar në kohë dhe pritet të jetë një element plus në repartin e sulmit. Drejtuesit e Tomorit e kanë cilësuar si shumë të domosdoshëm për objektivat e tyre në fazën e dytë. Duke nisur nga ndeshja me Besën, që do të luhet të dielën në orën 13:00 në Berat, trajneri Klodian Arbëri do të ketë luksin që krahas portugezit Felipe, të ketë të gatshëm në pankinë edhe brazilianin e sapoardhur, Guilherme Kaian. KASMOLLARI - Atmosfera në kampin beratas është optimiste në prag të ndeshjes me Besën. Tomori do të synojë që në fazën e dytë të
renditen mes gjashtë skuadrave më të mira të kampionatit. Kjo do t’i japë mundësinë për të shfrytëzuar më pas të gjitha shanset nëpërmjet fazës “play off”. Për gazetën ka folur mbrojtësi Paolo Kasmollari, i cili beson te trepikëshi ndaj kavajasve. “Vijmë nga një moment shumë pozitiv për sa i përket mbylljes së fazës së parë. Katër fitore në pesë javët e fundit nuk janë aspak një rastësi. Ne kemi si qëllim të vazhdojmë këtë rrugë. Jemi përgatitur maksimalisht gjatë kësaj jave, që edhe startin e fazës së dytë ta nisim aty ku e lamë në fazën e parë, me një fitore. Ftojmë tifozërinë tonë të mrekullueshme, që të vijë e të na mbështesë masivisht në stadium, sepse është një motivim ekstra për skuadrën në fushë”, ka përfunduar Kasmollari.