Skënderbeu “braktis” Durrësin, Dumfur: Harrojeni... blofin
Skënderbeu rikthehet në Korçë. Pas eliminimit nga Kupa e Shqipërisë, korçarët kanë lënë qytetin e Durrësit. Skuadra ka zhvilluar dje të parën seancë për llogari të Tërbunit, kundërshtar që e presin të hënën në shtëpi. Kjo ndeshje do të hapë fazën e dytë të kampionatit dhe llogaritë bëhen vetëm e vetëm me trepikëshin. Kur dihet që duan ngjitjen direkte në elitë, gabimet janë të ndaluara. Vështirësi ka, e megjithatë duhet thënë që skuadra ka ardhur në formë mjaft të mirë. Ivan Gvozdenoviç ka marrë sinjale pozitive nga të rinjtë, që janë bashkuar në janar dhe tashmë ka më shumë alternativa për të përballuar pjesën e tjetër të sezonit. Në ditët në vijim, pritet që trajneri të ndajë edhe formacionin, ku nuk përjashtohen surprizat.
RANDI – Bardhekuqtë kanë “arkivuar” Kupën e Shqipërisë dhe janë të fokusuar me të gjitha forcat te kampionati, atje ku duan të marrin maksimumin. Randi Dumfur as që e mendon blofin në javën e 14-të dhe këtë e thekson enkas për “Panorama Sport”. Për mesfushorin ganez, Skënderbeu është duke treguar një formë të mirë dhe prej kësaj mund të përballet me kokën lart ndaj çdo kundërshtari për të marrë maksimumin. “Prej momentit të parë, kam gjetur një klimë të shkëlqyer në ekip. A thua se rënia nga kategoria ka shtuar më shumë ambiciet e klubit. Në këtë situatë, duke parë edhe mundësinë që kemi në kushtet ku ndodhet ekipi, do të synojmë shumë më lart. Ekipi më pëlqen dhe ka marrë formën e duhur për të kërkuar maksimumin. Kjo është ajo që na pëlqen dhe na mban në fokus. Në ndeshjen ndaj Egnatias luajtëm hapur dhe deri diku nuk u ndien diferencat në fushë. Prandaj kemi mundësi të synojmë objektivin. Tani jemi të përqendruar vetëm te kampionati dhe do të bëjmë të pamundurën për të marrë maksimumin në çdo ndeshje. Blofin as që e mendojmë”, përfundoi afrikani.