Kolela dorëzohet për titullin, tani rrezikon shkarkimin

Trajneri i Partizanit, Xhovani Kolela, ishte tejet i zhgënjyer pas ndeshjes së humbur dje me Laçin. Në deklaratën për mediat pas sfidës, ai pranon se skuadra e tij nuk është në lartësinë për të fituar titullin. 56-vjeçari shprehet se tashmë Partizani nuk është ai i periudhës para janarit dhe kjo ndikon. Italiani i ka koduar herë pas here deklaratat e tij dhe ndoshta nuk bën përjashtim as kjo e fundit. Fakt është që ai po përjeton ditët më të vështira në krye të "demave".

Një paraqitje relativisht e mirë, por në fund një rezultat negativ. Çfarë mungoi në këtë ndeshje?

Mendoj se paraqitja ka qenë mjaftueshëm. Duhet të shtoj se kur ne bëjmë paraqitje të mira në dy ndeshje radhazi dhe në fund marrin vetëm një pikë, është e sigurt se diçka nuk shkon.

Çfarë nuk shkon saktësisht?

Është e thjeshtë. Nuk jemi skuadra që ishim më parë dhe nuk mund ta fitojmë kampionatin. Nuk mund të dalë e para një skuadër, që në 5 ndeshje, grumbullon 2 pikë.

Jeni i zhgënjyer nga largimet me peshë dhe afrimet, që ende nuk janë "ndezur"?

Nuk është kaq i thjeshtë ky diskutim. Kanë ardhur lojtarë mjaft të mirë, por nuk janë gati për momentin për shkak të problematikave të ndryshme. Nuk janë 100% fizikisht, ky është realiteti. E përsëris, momentalisht, duke parë që jemi 6 pikë larg Tiranës, mendoj se kjo skuadër nuk mund ta fitojë kampionatin.

Ky ngërç është mungesë cilësie apo problem psikologjik?

Mendoj se më shumë është çështje përgjegjësie, duke ditur

se skuadra duhet të mbajë përgjegjësi dhe nëse nuk ndodh kjo, e kemi të pamundur që të fitojmë kampionatin.

U duk sikur hyrja e Turkajt e kapi në befasi Partizanin te goli i parë. Ku u gabua në atë moment?

Një skuadër që vihet në vështirësi nga aktivizimi i një lojtari të skuadrës kundërshtare, do të thotë se nuk është një skuadër e aftë për të fituar titullin.

“LËKUNDET” STOLI Pas disfatës në ndeshjen e djeshme, stoli i Xhovani Kolelës ka pësuar një lëkundje të madhe. Ndaj Laçit ishte

ndeshja e pestë radhazi që të kuqtë nuk arrijnë të shkojnë te fitorja dhe gazeta mëson se kjo situatë ka krijuar mendime "të mjegullta" të presidentit Demi në lidhje me të ardhmen e trajnerit italian. Mbrëmë pas ndeshjes nuk ka pasur asnjë vendim nga ana e drejtuesve për fatin e Kolelës, por e sotmja do të jetë vendimtare. Burime për "Panorama Sport" kanë bërë me dije se Laçi ka qenë prova e fundit për italianin, por gjithçka mbetet për t'u verifikuar. Në orët në vijim drejtuesit pritet të kenë një takim, ku do të vendoset edhe e ardhmja e Kolelës.