Hepaj: Gol i paharrueshëm, na largoi makthi që na kishte zënë

Makthi mori fund për Besëlidhjen. Pas 113 ditësh gjetën rrugën e kthesës dhe iu larguan vendit të fundit. Pavarësisht se ende noton në ujërat e turbullta të rënies, të paktën janë më të qetë. Fitorja e tretë sezonale erdhi një javë pasi Artan Bano mori “timonin”. Merita ka pa diskutim trajneri, por mbi të gjitha mesfushori Samet Hepaj. Me atë gol në të 14-ën minutë i dha shpresë ekipit. Shkodrani është i lumtur për këtë trepikësh, por tani kërkon mobilizim. Gjatë një deklarate të dhënë për “Panorama Sport”, ai kujton se asgjë nuk ka mbaruar. “Pas një periudhe të gjatë stresi, u kthyem. Fitorja ndaj Turbinës ishte përtej trepikëshit. Kishim gati 4 muaj që nuk e shijonim. Tani e tutje, harrojeni që të ndalemi më. Jemi futur tashmë në korsinë e normalitetit. Unë e njoh shumë mirë Besëlidhjen,

sepse ky është sezoni im i shtatë që mbroj ngjyrat e saj, me një shkëputje njëvjeçare. Kam përjetuar edhe situata të tilla, por ne kemi ditur t’i përballojmë me sukses. Nuk ishte e lehtë si ndeshje dhe më duhet ta pranoj këtë, pavarësisht se zhvillohej në stadiumin tonë. Edhe kundërshtari kishte të njëjtin hall si ne, ndaj do të bënin çmos për të marrë barazimin dhe luftuam fort për t’ia dalë. Goli erdhi herët dhe kjo ishte edhe strategjia jonë, ta lodhnim psikologjikisht kundërshtarin. Kjo funksionoi dhe jam i lumtur që rasti i krijuar para portës cërrikase më takoi mua ta finalizoja. Ky gol do të mbetet gjatë në kujtesën time, pasi jo vetëm që shtoi në fondin tonë tri pikë të arta, por më kryesorja, na nxori edhe nga makthi psikologjik që kishte mbështjellë prej tetorit. Tani kam besim të plotë se ndryshimet rrënjësore që kanë ndodhur në ekip po fillojnë të ndryshojnë gjendjen. Tani të gjitha energjitë do t’i fokusojmë te transferta e radhës ndaj Besës. Do të luftojmë fort për vazhdimësinë. Një gjë është e qartë, se Besëlidhja nuk e mendon disfatën e rënies. Ne duam të mbetemi ekipi kërcënues i kreut”, përfundoi mesfushori 28-vjeçar.