Ksavi garë me veten, 15 ndeshje pa humbje
Me triumfin në Sevilje ka barazuar ecurinë e tij më të mirë
Barcelona marshon e pandalshme në krye të kampionatit spanjoll. Falë suksesit në fundjavë kundër Seviljes e ka çuar në 8 pikë diferencën me Realin e vendit të dytë. Një meritë e pakundërshtueshme në këtë ecuri i shkon dhe trajnerit Ksavi, i cili ka vendosur të bëjë një garë me veten. Suksesi më i fundit ndaj Seviljes ka qenë rezultati i 15-të pozitiv radhazi. Në këtë mënyrë ai ka barazuar rekordin e tij personal që e mbante në sezonin e kaluar, ku nuk njihte humbje në 15 takime radhazi. Më saktë, humbja e fundit dhe e vetmja e tij deri më tani në kompeticionet në Spanjë ishte ajo në javën e nëntë në La Liga më 16 tetor 2022 përballë Realit të Madridit. Që nga ajo humbje 1-3, janë 15 takimet radhazi mes kampionatit spanjoll, Superkupës së Spanjës dhe Kupës së Mbretit që Barcelona nuk njeh humbje, me një bilanc prej 13 fitoresh dhe dy barazimesh. Katalanasit nuk mundën të fitonin derbin e 31 dhjetorit kundër Espanjolit (11) dhe përballjen në kohë të rregullt me Betisin në gjysmëfinalen e Superkupës së Spanjës në Arabinë Saudite (2-2). Por me Betisin, katalanasit shkuan në finale pas lotarisë së penalltive.
BILANC MË POZITIV - Me këtë seri pozitive, Ksavi plotëson rekordin e tij më të mirë nga viti i kaluar, në të cilin ai gjithashtu mbeti i pamposhtur në 15 ndeshje. Asokohe, bilanci ishte 11 fitore dhe 4 barazime. Shifrat aktuale janë edhe më të mira se ato të sezonit 2021-2022. MBROJTJA - Kjo seri pozitive është mundësuar jo vetëm për shkak të golave të shumtë të shënuar (42), por veçanërisht dhe mbrojtjes, që është kthyer në pikën më të fortë të katalanasve. Në dhjetë ndeshjet që Barcelona ka luajtur në “Camp Nou” në La Liga në këtë sezon, ka pësuar vetëm një gol. Asnjëherë më parë skuadra nuk ka qenë kaq e fortë në prapavijë.