Mes së tashmes dhe së ardhmes, ja ku ka çaluar Interi
Interi ndodhet aktualisht 13 pikë larg Napoli dhe thuajse i dorëzuar për garën për titull, por nisja e mirë e këtij viti kalendarik ka sjellë patjetër pendesë në Milanon zikaltër, për atë që mund të kishte qenë ky sezon nëse do të kishin të njëjtin ritëm. Ndërsa skuadra e Inzagit ka treguar se mund të jetë në lartësinë e të mëdhave të tjera të Serisë A, ngelen për t’u parë gjërat që nuk kanë shkuar gjatë kësaj periudhe, që njëkohësisht janë edhe ato që duhet të rregullohen për të ardhmen.
NISJA E GABUAR - Gjashtë humbje në një fazë të vetme janë shenjë se triumfi në kampionat është larg. Interi po paguan edhe një herë tjetër nisjen e ngadaltë, ashtu si një vit më parë me skuadrën e Inzagit që nuk arrin të përsërisë një bllok suksesesh. Një moment i tillë duhet rishikuar gjithmonë, pasi vë në pikëpyetje aspekte të ndryshme. Gjendja fizike do të ishte e para, por nuk ndalon vetëm këtu, sepse edhe në janar kur gjendja fizike ishte në maksimum, zikaltrit u ndalën me Monzën dhe Empolin. Interi po ashtu nuk di të fitojë “pisët”, cilësi që duhet ta ketë çdo ekip që synon titullin, si një tregues i urisë së grupit.
MUNGESAT – Mungesat e Lukakut dhe Brozoviçit janë përdorur jo pak herë edhe nga trajneri Inzagi si një nga arsyet për rendimentin e skuadrës. Në fakt të zëvendësoje ata nuk ishte e thjeshtë, sepse të dy lojtarët janë konsideruar titullarë që në verë dhe mbi ta ishte ndërtuar një pjesë e madhe e strategjisë së zikaltërve. Mungesa e tyre e ka penguar teknikun në rrotacionet e tij në sulm dhe mesfushë dhe këtë e konfirmojnë 15 ndeshjet radhazi si titullar të Mikhitarianit dhe Lautaro e Xheko të padiskutueshëm në sulm, të pambështetur nga Korrea. Në këtë pikë klubi ka ende për të konfirmuar protagonistët e tij, nëse do të vazhdojë në të njëjtën rrugë apo jo.
SA LAMTUMIRA – Në verë grupi do të ndryshojë në të gjitha repartet, sepse një pjesë e mirë e organikës është në skadencë kontrate. Pas Shkriniarit me valixhe në duar janë edhe Handanoviç e Galjardini e me shumë mundësi edhe D’ambrozio. Açerbi e De Vraj nuk e njohin ende të ardhmen e tyre, ashtu di Brozoviç që mund të sakrifikohet e Lukaku për të cilin ngelet për t’u parë nëse do të rinovohet huazimi. Në fund është Dumfris, ai që pritet të jetë i sakrifikuari i madh i verës dhe mund të sjellë të ardhura të mjaftueshme. Kështu në nisjen e sezonit të ri mund të jetë një Inter krejt tjetër, diçka që nuk është domosdoshmërisht e keqe, duke pasur parasysh diferencën aktuale me kreun.