Mesi dhuron 3.5 milionë euro pas tërmeteve në Turqi e Siri
Tërmetet tragjike në Turqi dhe Siri kanë bërë bashkë të gjithë botën pasi qindra persona kanë kontribuuar në mënyrë financiare, fillimisht për ndihma ushqimore e mjete për të ndihmuar njerëzit që ndodhen nën rrënoja ende. Një ndër ta është edhe jashtëtokësori i futbollit, Lionel Mesi. Sipas raportimeve, nga një sërë mediash në Turqi, ylli argjentinas ka vendosur që t’i përgjigjet apelit për ndihmë dhe të shpërndajë ndihma humanitare në vlerë 3.5 milionë euro. Sulmuesi i PSG-SË dhe kampioni i botës në fuqi me Argjentinën i ka kërkuar fondacionit të tij që të dërgojë ndihma në vendet e tërmetit. Fondacioni “Leo Mesi” është një fondacion familjar që kujdeset për shëndetin dhe edukimin e fëmijëve në vështirësi nëpër botë. Ndonëse Leo është prezent me imazhin e tij, ai që e drejton është vëllai i tij i madh, Matias, i cili organizon aktivitete në partneritet me UNICEFIN. Edhe pse Mesi nuk është nga ata që kërkon reklamë për të tilla gjëra, sigurisht që kjo përgjigje nga ana e futbollistit ka prekur shumë persona në Turqi e Siri, edhe pse nuk është hera e parë që emri i Leos afrohet me të tilla akte të rëndësishme dhe bujare. Në periudhën e pandemisë, Mesi ishte ndër të parët që vendosi të kontribuojë për mjekët argjentinas, ata që ishin në linjën e parë të luftës me COVID-IN, duke ofruar 500 mijë euro për ta. Por akoma më shumë se kaq, vepra e tij më bujare është mbledhja e 30 milionë eurove fond me anë të fondacionit të tij, në vitin 2019, për të ndërtuar në Barcelonë një klinikë moderne të specializuar për fëmijët e prekur nga kanceri. Dhe pikërisht të tilla vepra e bëjnë edhe më madhështore figurën e këtij kampioni.