Bylisi ndryshon axhendën, Shensoi do përgjigje nga ekipi

Shtyrja e ndeshjes ndryshon planet e ekipit, kalendar i favorshëm

Bylisi ka ndryshuar axhendën e përgatitjeve, duke qenë se sfida ndaj Partizanit është shtyrë me një ditë. Takimi i planifikuar të zhvillohej ditën e diel në “Adush Muça” është shtyrë për të hënën në të njëjtën orë. Si rrjedhojë, skuadra do të stërvitet si zakonisht edhe nesër, kur do të zhvillojë seancën e fundit stërvitore prag-partizani. Skuadra gjithë javës ka qëndruar e grumbulluar, duke qenë se ka një ngjeshje kalendari, por edhe sfida delikate në këtë periudhë të kampionatit. Ballshiotët dhe vetë drejtuesit kanë vënë si synim me patjetër marrjen e tri pikëve, për më tepër që kalendari tashmë është në fazën e vet më interesante. Ajo që bie në sy është se deri në fundin e fazës së tretë, Bylisi luan edhe shtatë sfida, por që më shumë takime i luan në shtëpi, plot katër të tilla. Ballshiotët presin fillimisht Partizanin dhe më pas shkojnë në Laç. Pas kurbinasve janë dy sfida radhazi në shtëpi, ndaj Egnatias dhe Erzenit. Më pas skuadra e Shensoit do të luajë me Kukësin në transfertë, kurse në javën e parafundit presin Tiranën në Ballsh. Javën e fundit të fazës së tretë, mallakastriotët e luajnë në Shkodër me Vllazninë. Ndërkohë që trajneri i Bylisit Naxhi Shensoi është duke punuar me skuadrën më së shumti në repartin ofensiv, teksa pritet një paraqitje akoma më pozitive për sa i përket finalizimit, në mënyrë që të mos shpërdorohen raste, siç edhe ndodhi në takimin e fundit të kampionatit në Durrës. Në Ballsh, tashmë që gara është në fazë interesante dhe do të luajnë gjithçka për gjithçka, u kanë bërë thirrje tifozëve për mbështetje maksimale, duke nisur që nga sfida e radhës. Gjithsesi, ndryshimi i orarit të kësaj sfide nuk e favorizon aspak këtë apel.