Kolela: Bylisi rival i vështirë, jam i qetë për të ardhmen
“Tani nuk jemi për titull, por vazhdojmë me përulësi”
Partizani do të ndesh et sot në orën 13:00 me Bylisin në shtëpi, sfidë e vlefshme për javën e 21-të të Kategorisë Superiore. Në një prononcim për mediat, trajneri i “demave”, Xhovani Kolela, u shpreh se skuadra e tij do të përballet me një kundërshtar mjaft të vështirë, teksa foli edhe për gjithë vështirësitë që skuadra e tij po has në këto javë të fundit. Italiani, në lidhje me të ardhmen e tij ia kalon topin drejtuesve, teksa vetë mundohet të tregohet i qetë.
Përballeni më Bylisin, një kundërshtar i vështirë në një moment të vështirë...
Në një moment të vështirë, çdo kundërshtar është i vështirë. Edhe nëse momenti nuk do të ishte i vështirë, gjithsesi kundërshtari do të ishte i tillë. Është shumë e vështirë si skuadër, pasi na ka bërë presion edhe në ndeshjen e fundit që kemi zhvilluar.
Në javët e fundit nuk keni mundur të mbërrini te fitorja. Çfarë nuk ka shkuar në skuadër?
Për ta shpjeguar vetëm këtë pyetje do të më duheshin të paktën 30 minuta. Kur është një moment i vështirë nuk ka vetëm një motiv apo shkak. Ka shumë dhe të ndryshme. Dhe ajo që sapo thatë është e vërtetë. Në vitin 2023 nuk kemi arritur akoma një fitore. Dhe tashmë jemi të përqendruar për ta arritur diçka të tillë më në fund.
Partizani përmbyset ose barazohet kur shënon i pari. Përse ndodh kjo?
Ka gjithashtu shumë motive sa i përket këtij aspekti. Skuadra kur pëson gol nuk është vetëm problemi i mbrojtjes, por në tërësi. Edhe kur shënojmë është e njëjta gjë, meritë e të gjithëve. Ne nuk i japim shumë mundësi kundërshtarëve që të afrohen pranë portës, por e vërteta është se ato pak raste që kundërshtarët arrijnë në portë na shënojnë.
Do të jetë gati Rrapaj për ndeshjen e nesërme? Dhe sa i rëndësishëm është për ju rikthimi i tij?
Rrapaj është një lojtar i ri, i lindur në vitin 2001. Do ta ndihmojë shumë skuadrën në bazë të eksperiencës që ka me skuadrën. Këtu mund të konsiderohet si një lojtar me shumë eksperiencë, ndërsa në Itali do të konsiderohej vetëm si një lojtar i ri në moshë. Jemi të kënaqur që do ta kemi sërish
pjesë të organikës sonë. Ai ka disa ditë që nuk është pjesë e skuadrës sonë dhe mendoj se nuk do të jetë i gatshëm, të paktën për ta nisur ndeshjen nga minuta e parë.
I konsideroni Selmanin dhe Bilalin si favoritë për 11shen titullare?
Janë të dy lojtarët të gatshëm në ndeshjen e nesërme, por do ta shohim nëse do ta nisin lojën nga minuta e parë apo jo.
Si ndikon te ju fakti që ndryshojnë kaq shpesh oraret e ndeshjeve?
Ajo që më ka bërë më shumë përshtypje këtu është
ky fakt. Sa i përket një përgatitjeje, për shembull dyjavore, ne nuk kemi pasur një program real, pasi nuk i kemi pasur asnjëherë datat e fiksuara. Dhe kjo është diçka të cilën unë po e mësoj.
E konsideroni ndeshjen me Bylisin si një ndeshje që vendos shumë rreth së ardhmes suaj në krye të Partizanit?
Këtë pyetje nuk duhet të ma bëni mua. Unë nuk do ta marr si një ndeshje decizive, kam mësuar në jetë se edhe të tilla ndeshje duhet të merren si të radhës. Unë jam i qetë, vazhdoj të bëj punën time, pastaj për pjesën tjetër nuk më takon mua të jap një përgjigje.
Kemi parë që të bëni deklarata të koduara, ironi apo figuracione të ndryshme. Ajo e fundit pas ndeshjes me Laçin kishte ndonjë element të tillë?
Jo, e kisha seriozisht, sepse statistikat e tregojnë këtë. Mendoj se e vetmja gjë që është reale dhe e qartë, janë statistikat. Në kaq vite karrierë, unë nuk kam parë një skuadër që në pesë ndeshje të grumbullojë dy pikë dhe të jetë në luftë për titullin kampion.
Ka ndryshuar ndopak ky mendim i juaji në lidhje me
forcën e skuadrës gjatë përgatitjeve të kësaj jave?
Vite më parë, në një prej klubeve ku unë kam punuar, kam pasur pjesë të stafit një psikolog sportiv. Ky është një personazh shumë i rëndësishëm në Itali në botën e sportit. Ai thoshte se nuk ka gjë më të keqe për një futbollist, sesa të deklarojë objektiva, të cilat ai për momentin nuk ka mundësi t’i realizojë. Me shumë përulje kemi parë që kemi grumbulluar pak pikë në ndeshjet e fundit. Dhe me këtë përulësi kemi punuar për të marrë pikët duke parë dhe gjendjen e skuadrës.