Tetova: Fitore jetike, erdhi pas shumë vuajtjesh
Anuloi penalltinë, Latën e ndjekin deri në furgon
Trajneri i Egnatias, Edlir Tetova, ka theksuar se fi torja e së shtunës ndaj Laçit me shifrat 0-1 ishte më se e merituar për ekipin e tij dhe i dha fund krizës që po kalonte ekipi. Tetova pranon se skuadra nuk ishte në një situatë shumë të mirë psikologjike pas disa ndeshjeve të vështira.
NDESHJA - "Jemi shumë të kënaqur për këtë rezultat, falënderoj çunat! Sidomos në pjesën e parë dhe një fragment në të dytën kanë bërë siç duhet detyrat pas ndërrimit të skemës. Kishim provuar skemën e zakonshme dhe fakti që kishim pesë ndeshje pa fituar ndikon te lojtarët. Jemi munduar këto ditë që t'u japim më shumë qetësi e jo fjalë për të dalë te loja që bëmë sot. Kemi bërë ndeshje shumë të mirë, duke bllokuar pikat e pasimit të Laçit dhe ia arritëm qëllimit. Sinkronizimi i reparteve ishte kryesor. U kthyem te loja e pasimit, si në fazën sulmuese, ashtu edhe në ndërrimin e krahut të lojës. Të gjithë kanë qenë perfektë në detyrat e tyre".
LUHATJET - "Kemi pasur shumë oshilacione në rezultate e lojë. Shpresojmë që gjërat të vijnë njëra pas tjetrës, rezultati dhe loja. T'i japim më shumë besim skuadrës që të shkojmë te loja dhe rezultatet në mënyrë më të vazhdueshme dhe të qëndrojmë pranë objektivave tanë".
VËSHTIRËSITË - "Kemi pesë javë që rrimë të ngurtë, do të qetësohemi, do të shohim gjërat, por të gjithë janë të rëndësishëm për skuadrën, edhe stoli ka qenë aktiv dhe ka pranuar zgjedhjet e mia".
- "Jemi të ndërgjegjshëm që kampionati është në një udhë, ku skuadrat janë aty-aty. Mendoj se do të përballemi si të barabartë me Vllazninë", tha Tetova për "Oversport" pas sfidës.
GARA
Ndeshja mes Egnatias dhe Laçit, e përfunduar me shifrat 0-1 në favor të rrogozhinasve, është mbyllur me tension të madh. Në minutën e tretë të shtesës, Roganoviç ul një krosim nga goditja e dënimit dhe më pas pengohet nga Sherri. Fillimisht arbitri Florjan Lata akordon penallti për Laçin dhe ndëshkon me të verdhë portierin. Pas një komunikimi me VAR-IN, Lata shkon ta rishohë rastin në ekranin e VAR-IT, ku vëren se para ndërhyrjes ka një pozicion jashtë loje të Roganoviç në momentin e krosit të Mazrekajt. Megjithëse nuk është e qartë nëse arbitri kryesor mund të shkojë të shohë një rast për pozicion jashtë loje në ekranin e VAR-IT, vendimi i Latës për të anuluar penalltinë është i drejtë.
- Gjithsesi, "Panorama Sport" mëson se vendësit nuk janë treguar aspak të qetë pas ndeshjes. Ata kanë qenë të bindur për parregullsinë e vendimit të gjyqtarit Florjan Lata dhe kanë protestuar në mënyrë shumë demonstruese. Tensioni ka qenë aq i lartë, sa drejtues të klubit kurbinas kanë shkuar t'u kërkojnë llogari gjyqtarëve deri në furgonin e VAR-IT, i cili qëndronte jashtë stadiumit. Në lidhje me këtë incident, arbitrat janë ndier të kërcënuar, teksa FSHF-JA është në dijeni të plotë për këtë ngjarje. Mbetet të shihet nëse për kurbinasit do të përballen me masa ndëshkimore në lidhje me këtë incident.