“Patëm të papritura, Mikeli shleu gabimin e penalltisë”
Klevis Dalipi i quan të çmuara pikët, ndonëse e pranon që ishin të vuajtura. Gjatë një analize që i bën ndeshjes, trajneri i Lushnjës tha: “Ishte një ndeshje me shumë të papritura. Kryem ndërrim të detyruar të Alushit, që është përshtatur shumë mirë me modulin e lojës dhe ka eksperiencë. Pastaj Canka humbi penallti, gjë që u ka ndodhur futbollistëve të mëdhenj. Nëse do të kishim shënuar që në minutë të 6-të, gjërat do të ishin ndryshe ndoshta. Loja pati tension e pasiguri. Ishte ndryshe në krahasim me atë të Burrelit. Nëse atje duhej të bënim shumë mirë në fazën mbrojtëse dhe të shfrytëzonim kundërsulmin, këtu duhet të ishim shumë të kujdesshëm. Të kishim pasime dhe një kontroll më të mirë të lojës. Megjithatë, duke kaluar minutat u munduam të luanim. Tomori nuk ishte i lehtë. Edhe ata vinin për të marrë pikë. Janë pak më komodë, por jemi në të njëjtën “valle”. Le të themi që pjesa e dytë nisi pak më mirë. Ne ishim më të qartë. Dilnim pak më rrjedhshëm në sulm, por nuk po finalizonim. Goli i parë i Pepës erdhi si rrjedhojë e presionit tonë. Ndeshja foli pak më mirë për ne. Ishim të kujdesshëm gjithë kohës. Deri në momentin që Canka me golin e tij fshiu me ‘gomë’ gabimin e penalltisë së humbur. Atë gol vetëm ai mund ta shënojë. Ndodhi pastaj që morëm një gol nga hiçi. Në ato minutat e fundit patëm vështirësi për ta menaxhuar rezultatin. Në këto momente nuk luhet më lojë e bukur. Na duhet vetëm rezultati. I përgëzoj çunat për shpirtin, por duhet të kuptojnë. Ata më kanë ndjekur vazhdimisht, në kohë rekord. Nuk jemi akoma aty ku duhet”.