Gjashtë shqiptarë tundin Europën
Seferi realizon në miqësore, gjejnë rrjetën edhe Armando Dobra me Indrit Tucin
Nga Ukraina, Kroa cia, Italia dhe deri në Angli, shqiptarët shënojnë. Janë plot gjashtë legjionarë që kanë tundur rrjetat me ekipet e tyre këtë fundjavë. Nga Seferi, që shënon në miqësore dhe deri te të rinjtë Toçi dhe Shpendi.
SEFERI- Ish-sulmuesi i Tiranës, Taulant Seferi, ka gjetur rrugën e rrjetës me ukrainasit e Vorskla Poltavës, në testin miqësor ndaj Levadia Talin që përfundoi me rezultatin 3-2 në favor të skuadrës së sulmuesit shqiptar. 26-vjeçari shënoi golin e tretë me një goditje fluturimthi me të parën pas krosit të shokut të skuadrës nga e djathta e zonës. Në kampionat, sulmuesi shqiptar ka arritur të shënojë 4 gola, duke u shpallur edhe një herë lojtari i muajit.
SHPENDI- Vazhdon sezoni i shkëlqyer i Stiven Shpendit në futbollin italian, ku në këtë edicion bashkë me vëllain e tij binjak, Kristianin, po luan mes profesionistëve, edhe pse të dy janë 19-vjeçarë. Stiven është titullar te Çezena dhe vendin e ka fituar falë golave që po shënon me një rregullsi të admirueshme. Dje, në sfidën në transfertë ndaj Imolezes, ai shënoi golin e tij të 9-të në këtë kampionat. Shpendi shënoi golin e tretë për skuadrën e tij në fitoren 4-0 të Çezenës, e cila është drejt ngjitjes në Serinë B.
TOÇI- Eljon Toçi po spikat si një nga sulmuesit e perspektivës me lojën e tij në radhët e skuadrës së të rinjve të Fiorentinës. Sulmuesi, i cili është edhe kapiteni i kësaj skuadre, ka qenë protagonist i fitores e djeshme me shifrat 21 ndaj Udinezes. Një asist i tij në minutën e 20-të solli avantazhin dhe kur miqtë barazuan shifrat, Toçi ishte ai i cili zgjidhi ndeshjen. Sulmuesi lëshoi një goditje të fortë nga jashtë zonës duke ndalur topin në rrjetë dhe duke i dhënë ekipit fitoren dhe shkoi festoi në pankinë me trajnerin Alberto Akuilani. Ky ishte goli i 5-të i këtij edicioni për sulmuesin shqiptar.
TUCI- Indrit Tuci gjeti rrugën e rrjetës me fanellën e Lokomotivës së Zagrebit në triumfin 0-4 që skuadra e tij arriti në transfertë ndaj Sibenikut. Ky ishte goli i katërt në 17 ndeshje për sulmuesin e Shpresave, i cili gjithashtu ka regjistruar edhe 2 asiste.
DOBRA- Armando Dobra gjeti golin e katërt në kampionat me fanellën e Çesterfildit në disfatën 1-3 që skuadra e tij pësoi në shtëpi ndaj Nots Kantrit. 21-vjeçari shqiptar vendosi baraspeshën e përkohshme në minutën e
45+3, duke çuar peshë zemrat e tifozëve vendës, po më vonë u pësuan dy gola të tjerë. Për sa i përket Dobrës, paraqitja e shqiptarit ishte e kënaqshme, teksa qëndroi në fushë gjatë gjithë lojës.
MERKAJ- Silvio Merkaj është kthyer në një nga sulmuesit më të përfolur në kampionatin e Serisë C në Itali. Sulmuesi 25-vjeçar po shënon me një rregullsi të admirueshme me skuadrën e Entelës dhe këtë fundjavë ka arritur shifrën e 10 golave. Goli i 10-të erdhi në ndeshjen ndaj Olbias.