Pep: Titujt i fituam në fushë, s’kemi faj pse rrëshqiti Xherrardi

Ka rihapur edhe njëherë kampionatin, ndërsa të mërkurën mund të barazojë llogaritë me Arsenalin, por Pep Guardiolës nuk i del e keqja me hetimin që ka nisur kundër klubit të tij për shkeljen e rregullave të “Fair Play”-t Financiar të Premier Ligës. Kampionët e Anglisë rrezikojnë nga heqje pikësh deri në përjashtim nga Premier Liga, por katalanasi është i sigurt në pafajësinë e skuadrës së tij. Pasi akuzoi 19 klubet e tjera për një komplot ndaj ekipit të tij, Guardiola është i sigurt se skuadra e tij do të dalë e palarë nga i gjithë ky proces dhe 115 akuzat që rëndojnë mbi ta për shkelje gjatë viteve 2009-‘18, do të bien pas hetimit të Komisionit të Pavarur. Siti ka fituar 6 tituj kampion, 2 Kupa FA dhe 6 Kupa Lige prej vitit 2009. “Lërini këto. Këto trofe na takojnë neve absolutisht, pavarësisht dënimit të mundshëm. Mendoni se çfarë kemi bërë, askush nuk mund të na i heqë ato. Momentet e bukura dhe të këqija që ne jetojmë janë pjesë e gjithçkaje dhe nuk do të ndryshojnë”. Guardiola ka fituar 11 trofe në 7 vite në “Etihad”. Dhe ai nuk e kurseu ironinë me rivalët që nuk kanë arritur dot që t’i mundin në fushë. Ai mori si shembull rrëshqitjen e Xherrardit në ndeshjen në “Anfield” kundër Çelsit në vitin 2014, e cila i kushtoi titullin

“Reds”-ave, fituar nga “Qytetarët” në javën e fundit. “Momenti që vendosi titullin ishte goli i Agueros dhe nuk mendoj se ne jemi fajtorë për rrëshqitjen e Stiven Xherrardit në ‘Anfield’. Cili ishte faji ynë? Premier Liga do të vendosë, por unë e di çfarë kemi fituar dhe mënyrën se si e kemi fituar”.

ARSENALI – “Arsenali ka një ndeshje më shumë në dispozicion. Do shohim pasi kampionati të luajë të gjitha takimet. Por ne do shkojmë në Londër për të fituar. Kur një skuadër ka 50 pikë në fazën e parë kjo ndodh sepse ata janë shumë të mirë. Ne e ngushtuam diferencën, sepse luajtëm shumë mirë ndaj Aston Vilës. Tifozët ishin fantastikë. Halandi? Mori një goditje dhe nuk po ndihej mirë. Duke qenë se po fitonim 3-0 nuk donim që të rrezikonim. Do ta vlerësojmë në ditët e ardhshme. Nëse ai nuk do të jetë gati për Arsenalin, do të luajmë me një sulmues tjetër. Shpresojmë që të jetë gati, por do të shohim. Ne nuk jemi një skuadër e pabesueshme në tranzicion dhe duhet të luajmë pak më shpejt. Por në tërësi, bëmë një ndeshje shumë të mirë”.