Fitore milimetrike për Juven, Alegri: Dua Ligën e Europës
Trajneri: Boll na vërshëllyet, tredhëmbëshi më pëlqeu
Juventusi i parë i 3 “ten orëve”, Di Maria-vla hoviç-kieza, mund Fiorentinën, duke dhënë impaktin se funksionon shumë mirë, edhe pse tri pikët erdhën jo me pak drithërima. Madje, në minutën e 89-të, Juventusi mbajti frymën, nëse nuk do të kishte qenë për rolin që ka marrë tashmë teknologjia në futbollin e sotëm. Gjithsesi, e rëndësishme është që në fund, ata që festuan ishin bardhezinjtë, falë një goli të Adrien Rabiosë në minutën e 34-t. Madje, edhe pas krosimit kirurgjikal të Di Marias, goditja e francezit pati nevojë për teknologjinë për t’u kuptuar nëse kishte kaluar vijën fatale apo jo dhe syri i fajkoit mes shtyllave ia konfirmoi këtë. Edhe në pjesën e dytë, sërish teknologjia, këtë herë i erdhi kundër në favor Juventusit (me të drejtë), duke mohuar golin e 2-0 të shënuar nga Vlahoviçi, për çështje milimetrash, ndonëse duhet thënë se serbi, ndryshe nga ndeshja me Salernitanën, ishte më i fikur dhe kontribuoi pak në fushë. Ai ishte disi i shpërqendruar, njësoj si Kostiçi, që humbi një gol gjysmë të bërë me portën e boshatisur, kur ndeshja ishte 0-0, apo edhe Ken që përplas në dy raste topin në trupin e portierit, në vend që të mbyllë ndeshjen. Mbrëmjen e djeshme, sërish Di Maria ishte fari i lojës bardhezi, për aq sa luajti, por edhe Lokateli e Rabio bënë një ndeshje të madhe, duke i dhënë edhe një sinjal të qartë francezëve të Nantës, me të cilët do të kërkojnë 1/8-at e Ligës së Europës, objektivi kryesor i Juves tashmë, pas dënimit në Serinë A.
FLET ALEGRI – “Boll më me këto vërshëllima për De Shiljon, Kenin e Paredesin. Nëse doni të mbështesni skuadrën ejani, përndryshe kjo është një mungesë respekti kundrejt të gjithëve ne dhe unë nuk e pranoj”. Alegri e nis me tension konferencën për shtyp, duke i dhënë një mesazh tifozëve, por ndërkohë drejton kokën menjëherë tek objektivi i radhës, ndeshja e vajtjes me Nantën, për Ligën e Europës: “Ky është momenti në të cilin kemi më shumë nevojë për tifozët se kurrë, por këtu ka ca njerëz që vijnë në stadium vetëm për këtë. Më vjen keq, sepse ishte një ndeshje e luftuar dhe një fitore e madhe nga ana jonë. Festimi përpara arbitrit? Nuk e di nëse e meritoja të verdhën, sepse nuk festova kundër arbitrit, por doja të çlirohesha, pasi meritonim fitoren. Mendoj se bëmë një paraqitje shumë të mirë dhe trio Kieza-vlahoviç-di Maria bëri gjëra shumë të mira, ndonëse nuk e di nëse do të jenë sërish në fushë ndaj Nantës. Pikësëpari për ne e
rëndësishme është që po nisim të lëvizim renditjen në kampionat, por Liga e Europës është edhe më e rëndësishme, pasi ky turne mund të na ndryshojë shumë gjëra, edhe pse ndaj francezëve nuk do të jetë aspak e lehtë, pasi janë një skuadër fizike”, deklaroi Alegri.