Dinamo “hedh” Fall, barazon dhe mban larg Skënderbeun
Temitope nuk u mjafton korçarëve, ka nerva për një pikë
Dinamo nuk di të arratiset, por të paktën shmangu humbjen. Supersfida me Skënderbeun nuk shkoi më larg se një barazim. Një ndeshje vërtetë e madhe për historinë dhe trofetë që klubet mbartin, por jo për atë që treguan në fushë. Loja nuk u ngjit kurrë mbi nivelin mesatar, ndoshta edhe për shkak të terrenit të keq të “Selman Stërmasit”. E megjithatë, lufta sportive, golat dhe nervat nuk kanë munguar nga fillimi e deri në vërshëllimën e fundit të kryesorit Kreshnik Cjapi.
PJESA E PARË - Dinamo nuk mundi ta çonte në +7 diferencën me korçarët, por të paktën i mbajti ata 4 pikë pas. Ashtu si me Flamurtarin, kjo sfidë nisi keq për blutë, të cilët pësuan gol menjëherë. Teksa skuadra po dilte përpara nga një goditje standarde, një top i çuar në zonë nga korçarët gjeti sulmuesin Temitope, i mbajtur në pozicion të rregullt nga Vokrri, dhe ai e dërgoi në rrjetën e Krostës. Malorja bëhet edhe më e fortë për skuadrën e Nevil Dedes, të cilët përpiqen të reagojnë. Arrijnë që të krijojë tri raste të mira goli në pjesën e parë, por pa mundur të barazojnë. Prodani gjen të gatshëm Ruçin në rastin e parë, kurse në të dytin traversa i mohon festën e golit. Rasti tjetër i humbur ka protagonist Smaçin. Pa u mbushur gjysmë ore lojë, Dinamo humb Preloshin për dëmtim dhe në fushë futet Taulant Marku, duke sakrifikuar për skuadrën pas dëmtimit që kishte pësuar një javë më parë. Skënderbeu përpiqet të rrezikojë me kundërsulme dhe e vënë shpesh në presion mbrojtjen e vendësve.
PJESA E DYTË - Në pjesën e dytë, korçarët nuk e kanë më Moraesh në fushë. Ai dëmtohet dhe i lë vendin Zenullarit. Marku ka rastin e artë të barazojë, por goditja me kokë, pas krosit të Bardhit, nuk është e saktë. Temitope gabon në anën tjetër, duke gjuajtur jashtë. Skënderbeu pretendon edhe për një penallti në të 52ën dhe ishte e pastër, kur Dikson ndërhyn në zonë ndaj Likës, por Kreshnik Cjapi mendon ndryshe. Sheh vetëm simulim nga ana e sulmuesit të Skënderbeut. Dede bën lëvizje nga stoli, duke hedhur në fushë Zhivanajn dhe Fall e më pas vjen radha e Lilajt dhe Gjonit. Blutë përpiqen me të gjitha mënyrat të barazojnë dhe ia arrijnë qëllimit vetëm
në minutën e 81-të, kur Denison jep një top të bukur për T.markun në të majtë. Sulmuesi kroson në gjysmëlartësi dhe Fall bën devijimin fitues, duke e çuar topin në rrjetën e Ruçit. Kryeqytetasit marrin zemër dhe kërkojnë golin e dytë, por edhe rrezikojnë
ta pësojnë prapa. Ka edhe momente nervozizmi mes lojtarëve të dy skuadrave, nuk mungojnë as kartonët e verdhë dhe dëmtimet. Edhe 6 minutat shtesë kalojnë pa ndryshim rezultati dhe Dinamo e Skënderbeu ndajnë nga një pikë.