Kuka: Flamurtari në elitë, më frymëzon... Nojer
Portieri: Vendi i parë në kampionat është një detyrim për ne
Flamurtari gjeti pa suesin e Shpëtim Moçkës me afrimin e portierit Klajdi Kuka në formë huazimi nga Laçi. 32vjeçari ka një eksperiencë të gjatë në shumë ekipe në Superiore, por edhe në Kategorinë e Parë. Në intervistën e parë për “Panorama Sport” si portier i kuqezinjve, Kuka deklaroi ndër të tjera se nuk e kishte menduar se një ditë do të ishte në Vlorë. Portieri tiranas i jep të drejtë administratorit Sinan Idrizit, që kërkon vendin e parë, pasi ka investuar shumë në merkato. Ai thekson se nuk ka ardhur në Vlorë për turizëm, por për të arritur objektivin e klubit. Kategorinë e Parë e cilëson të vështirë edhe për shkak të terreneve në disa stadiume. Kuka zbulon se e frymëzon portieri Nojer dhe se videot e tij i ka pasur si shembuj gjatë stërvitjes, por gjithashtu si një ide për t’u zhvilluar më shumë.
Kuka, si ndiheni pas transferimit te Flamurtari. A mund të themi se jeni ambientuar plotësisht?
Të them të drejtën, kam gjetur një klimë mjaft pozitive në ekip. Pavarësisht se skuadra vinte pas një humbjeje, falë punës shumë serioze gjatë javës dhe kualiteteve që kemi, arritëm të ktheheshim te rezultatet pozitive.
E kishit menduar ndonjëherë se do të luanit në Vlorë në këtë moment të karrierës, për më tepër që tani jeni 32 vjeç?
Të jem i sinqertë, këtë vit nuk e kisha menduar që mund të luaja te Flamurtari, edhe për faktin që ekipi bëri një merkato të plotë gjatë verës. Mbi të gjitha, isha pjesë e një ekipi që luajti në Kupat e Europës si Laçi, por në futboll është “kurrë mos thuaj kurrë”.
Flamurtari ka si objektiv vetëm ngjitjen në Superiore, mendoni se është e arritshme?
Nuk mendoj që kam ardhur në Vlorë për turizëm. Objektivi i klubit është edhe synimi im primar si futbollist. Ne si futbollistë sakrifikojmë çdo gjë, duke filluar nga largësia me familjen, për të arritur në fund të sezonit kënaqësinë e një qyteti të tërë, që sigurisht është ngjitja në Superiore.
Si ju duket Kategoria e Parë këtë sezon?
Kategoria e Parë nuk është diçka e re për mua, pavarësisht se isha pjesë e Superiores në pjesën e parë të këtij sezoni. Dua të them që në disa aspekte është shumë më e vështirë, duke filluar nga terrenet e vështira që kanë disa skuadra.
Presidenti i klubit, Sinan Idrizi, ka vënë kusht vendin e parë. Jeni të bindur se do ta kapni Dinamon?
Presidenti Idrizi, jo më kot kërkon vendin e parë. E thashë edhe më lart, Flamurtari bëri një merkato të plotë gjatë verës dhe po ashtu në janar u mundua të plotësonte disa pozicione ku e shihte të arsyeshme. Përderisa është korrekt në çdo gjë, ka të gjithë të drejtën të kërkojë vendin e parë dhe ky është detyrim për ne.
Kush ju frymëzon nga portierët në futbollin botëror, e keni një idhull?
Portieri më i kompletuar në futbollin modern mendoj që është gjermani Nojer. Për mua ka qenë një shembull, pasi duke parë videot e tij gjatë stërvitjeve, jam munduar që të krijoj një ide për t’u zhvilluar sa më shumë si portier. Sigurisht që është e pamundur të arrish ato nivele, por për momentin dua vetëm të ndihmoj ekipin, duke dhënë maksimumin tim dhe eksperiencën time gjatë këtyre viteve.