Interi ngec ndaj Sampit, Barela kriset me Lukakun
Interi nuk shkoi më shumë se një barazim pa gola në "Luixhi Ferraris", aty ku Sampdoria e ish-it Dejan Stakoviç arriti të ndalte edhe një herë tjetër zikaltrit, që përsëri nuk u dhanë dot vijimësi rezultateve pozitive pas asaj fitoreje të ardhur në derbi. Zikaltrit, që ruajnë gjithsesi vendin e dytë edhe pse 15 pikë larg Napolit, shpërdoruan dhe shfaqën edhe shenja nervozizmi, me protagonistë Barelën e Lukakun.
EKUILIBRI
Inzagi riktheu titullar Lukakun krah Lautaros, por nuk bëri të njëjtën gjë me Brozoviçin që e nisi nga stoli. Ishte pikërisht dyshja e sulmit që u kujdes që Interi të vendoste diktatin e vet që në fillim të lojës, me Auderon që shpëton portën e Sampit në të dyja rastet. Vendësit ama nuk dekurajohen dhe tentojnë të shfaqen, edhe pse zikaltrit nuk lejojnë hapësira. Skenën do ta vidhte Çalhanoglu me një goditje që shkon ngjitur me portën në të 12'-ën dhe më pas edhe Lauataro që nuk përfiton nga një pasim i Darmianit brenda zonës. Interi shfrytëzon momentin pozitiv për të vendosur nën presion dorianët, por pa mundur dot të konkretizojë aksionet. Shpërdorimet e miqve i japin zemër Sampdorias, që pas 33 minutash kërcënon me anë të Lamers, ndërkohë që Interi e mbyll pjesën e parë në rënie të lirë. Në të dytën, Inzagi zgjedh Dimarkon për të ndryshuar ndeshjen, por krosimet e anësorit të majtë hasin në murin e Sampit, që kërkon edhe kundërsulmin me anë të Gabiadinit, por pa rezultat. Pavarësisht zëvendësimeve të të dy trajnerëve, gjërat ndryshojnë pak, ndërkohë që zikaltrit pretendojnë edhe për një prekje me dorë të Uinksit, që u konfirmua inekzistente. Dy mundësi të mira edhe për Çalhanoglunë, që përpiqet ta zgjidhë ndeshjen nga jashtë zone, pa mundur ama ta dërgojë topin në rrjetë, me tentativën e fundit që po nga jashtë zone i përkiti Françesko Açerbit. Në fund zikaltrit u kënaqën vetëm me një pikë, duke tensionuar edhe më shumë klimën rreth tyre.
SHKËNDIJAT
Interi nervoz dhe në vështirësi u paralajmërua që në fund të pjesës së parë kur
Barela dhe Lukaku patën një episod tejet të tensionuar. Mesfushori u shfaq në nisje të ndeshjes me krahët e ngritur në shenjë proteste, fillimisht me arbitrin dhe më vonë edhe ndaj shokëve të tij për pasimet e gabuara dhe të munguara. Edhe pse stoli i Interit u përpoq disa herë ta qetësonte, italiani nuk i kontrolloi dot nervat dhe në ankesën e radhës të tij, Lukaku nuk qëndroi indiferent. "Qepe, mjafton! Mos guxo ta bësh më!", iu drejtua sulmuesi Barelës, referoi "Dazn", fjalë që u pasuan nga heshtja e Nikolos.