“Tolerancë zero”, Bano kërcënon me formacionin
Trajneri analizon humbjen, “lumë” kritikash “Eliminoni gabimet, fitorja me Lushnjën bëhet kusht”
Besëlidhja rrezikon seriozisht rënien në Kategorinë e Dytë. Më keq se këtë sezon, nuk ka qenë kurrë. Edhe pse kanë 15 vite larg elitës, në të tilla “ujëra” s’e kanë parë veten. Humbja 2-0 përballë Besës i ktheu në vendin e 14-të, duke rënduar misionin. Përtej ankesave që kishin për gjykimin, pa “lagur” nuk kanë dalë as lojtarët. Kjo u kuptua në analizën e zhvilluar dje në ambientet e stadiumit. Përveç kritikave të lëshuara nga stafi teknik, nuk munguan as ato nga presidenti Xhulio Noka dhe drejtori Agustin Marku. Të gjitha fjalimet kishin një emërues të përbashkët, reagim të menjëhershëm. Toleranca do të jetë “0” në 10 ndeshjet e mbetura të këtij kampionati. Trajneri ka “kërcënuar” edhe me formacionin, ndërsa vendosi si kusht fitoren përballë Lushnjës. “Përtej gabimeve të gjyqtarit, ekipi nuk e dha atë që pritej, sepse gjatë gjithë javës stërvitore kishte një mobilizim dhe performancë të kënaqshme”, kështu e nisi analizën trajneri. Ai priste tjetër gjë përballë kavajasve. Ishte i bindur që barazimin mund ta merrnin, por gabimet i ndëshkuan. “Ekipi duhej të jepte maksimumin ndaj Besës. Një pikë të paktën mund ta merrnin, çka do të na mbante aty ku u ngjitëm javën e kaluar. Tani u kthyem prapë në fund. Kam besim, sidoqoftë. Gabimet e shfaqura në atë ndeshje, do t’i eliminojmë. Në çdo seancë duhet të përqendroheni për të ndrequr veten, në mënyrë që ndaj Lushnjës të jemi në lartësinë e duhur. Formacionin nuk e bëj unë, por performanca juaj. Ajo që bëni në ndeshje dhe stërvitje, është vendimtare. Kush e meriton është pjesë e 11-shes. Pozicioni
në të cilin ndodhemi nuk na lejon gabime, pasi jemi në limitet e rënies. Ne duhet që me çdo kusht të fitojmë ndaj Lushnjës, sepse çdo rezultat tjetër përveç fitores nuk vlen. Duhet të marrim karikimin maksimal për ta mundur Lushnjën. Vetëm pikët e plota na rikthejnë në shinat e mbijetesës. Koha nuk pret, pasi nga java në javë ngushtohen hapësirat e rikuperimit, çka na detyron që të bëjmë maksimumin për ta ngritur ekipin aty ku e meriton me kualitetin që kemi mes jush”, tha mes të tjerash gjatë fjalës së tij, numri një i stolit të Besëlidhjes.